La Uniun Maestri Ladins dla Val Badia é na assoziaziun profescionala lëdia danter insegnanć y dirigënć en sorvisc o en ponsiun dles scores ladines, che ô laurè tla scora y por le bëgn de chësta aladô di prinzips dla religiun catolica.

La Uniun se tol dant de:

- formè la personalité educativa cristiana che garantësc la liberté y dignité dla persona;

- studié i problems dl’educaziun y dla scora, suradöt chi che taca adöm cun nüsc posć, cun les carateristiches y tradiziuns de nüsc paîsc;

- defëne i dërć dla scora ladina y la svilupé por le bëgn dla popolaziun;

- manajè la colauraziun danter Scora, Familia y Dlijia;

- orientè y preparè i insegnanć por les problematiches dla scora, dla sozieté y dl’aministraziun publica. La Uniun fej propostes por les lites di rapresentanć ladins tles organisaziuns desvalies;

- organisé cursc de formaziun, iadi culturai, orela cörta y ativitês sportives por direturs, insegnanć atifs y en ponsiun, maestres y colaboradësses pedagogiches dla scolina y personal de secretariat.