In jöbia ai 12 de jügn 2008 domisdé à tignì la scora elementara de San Ćiascian na bela festa d’aisciöda a chëra che al é inće gnü invié i geniturs. Al é stè en ocajiun pur ruvè adöm denant che mët man les vacanzes. Pur l’ocajiun à i mituns dla scora elementara adöm ales maestres arjigné ca en rich program por düć i presënć. I geniturs à podü avëi na bela aurela cörta cun ćianties y rimes portades dant dai scolars. En bel ciüf tì é gnü surandè a döt l’corp insegnant dla scora.

Festa ti él inće gnü fat in chësta ocajiun a nost Siur curat Siur Heinrich Ellecosta y ala maestra Clara Cristina che cun la fin dl ann scolastich 2007/2008 é jüs in ponsiun. Nost Siur curat à insigné por 25 agn alalungia religiun tla scora elementara da San Ćiascian. El instës à sotligné l’bun tlima danter insegnanć y scolars che à caraterisé i agn de insegnamënt tla scora  da San Ćiascian. Propi dan da 25 agn al inće ël benedì l’ fabricat dla scora nöia dl paîsc. Lascè l’monn dla scora dô da 25 agn lascia en sëgn de “incherscimun”, mo scioch i scolars à purté dant tles rimes, podarà Siur curat, dala calonia cà ciaré jö sön plaza de scora y sce al o bàstel en “pice salt” pur gnì cà. Cun la fin dl ann de scora é inće jü in ponsiun la maestra Clara Cristina da Lungiarü, che à insigné cun gran dediziun por 37 agn tla scora da San Ćiascian. Uramai düs generaziuns dl paîsc à albü la Cristina sciöch maestra. Sò gran impëgn a bëgn dl insegnamënt y dla formaziun di scolars dla scora dl paîsc da San Ćiascian lascia gragn früć. Cun impëgn,responsabilité y competënza ala dediché döta süa cariera scolastica a bëgn dala scora elementara da San Ćiascian. Inće a inom de döt sü scolars Ti dijun en bel giulan.   

Inće sce nia ufizialmënter,é l’ann de scora 2007/2008 inće stè l’ultimo ann de insegnamënt por la maestra Ploner Erna, che dô passa 32 agn de insegnamënt tla scora elementara jarà en ater ann inponsiun. En bel giulan ti va inće ad ëra por sò gran impëgn y dediziun por i agn de insegnamënt. En rengraziamënt particolar ad ëra por avëi três insigné ite ćianties ai scolars y acompagné musicalmënter i scolars de diversces ocajiuns. Ela à insciö purté pró ad abelì tröpes festes de scora, religioses y dla comunité da San Ćiasciann. A inom dla fraziun y di geniturs da San Ćiasciann ti él gnü surandè ai insegnanć jüs en ponsiun en bel diplom por gragn mirić tl ciamp dla scora elementara da San Ćiascian. Inće da pert dla direziun dles scores à la dut.ia Canins Claudia audè a Siur Heinrich, ala maestra Ploner Erna y ala maestra Clara Cristina DAT l’bun, en bel giulan y fat les mius audanzes por l’tëmp da gnì.  La scora dl paîsc é la cöna por en bun svilup dles conescënzes de nüsc mituns. Chilò mët man la “scora dla vita” pur en bun svilup de nosta comunité porchël ti va en gran giulan ai insegnanć che cun gran dediziun, savëi, ligrëza y cör sa dediché tröc agn a nüsc mituns. 

En bel giulan inće a dötes les maestres y personal dla scora da San Ćiascian che tl dagnì se darà jö inant cun dediziun y ligrëza a bëgn de nüsc mituns.

Thoma Pescollderungg