L'Istitut Ladin se crüzia de invié ia iniziatives che dëida conservè y promöie le lingaz y la cultura ladina en general. Danter l'ater se crüziel de dè fora publicaziuns por ladin y te d'atri lingac sura le raiun, le lingaz y la cultura ladina. Na pert importanta dl'ativité dl Istitut é ince le sostëgn a uniuns culturales che à i medemi fins dl Istitut.

Chisc é i fins dl Istitut Ladin plü tl menü:

	studié a livel scientifich lingaz, storia y cultura di Ladins dles Dolomites, lauran adöm cun universitês y istituc spezialisà nazionai y da foradecà y cun d'atres uniuns culturales che à i medemi fins. Le mioramënt dl ladin scrit y baié dess, sce ara va, gnì metü a jì en colaboraziun cun les scores di paîsc ladins y cun l'Istitut Pedagogich Ladin;
	mantignì, defëne y fà crësce la cultura, les usanzes y les tradiziuns, l´ert, le ciantè di Ladins y dè forza al mantignimënt dl lingaz scrit y baié tres i mesi de informaziun, les publicaziuns, manifestaziuns culturales, cursc d'ajornamënt programà por alzè le livel cultural en general;
	mëte sö n archif cun documënc, fotos y registraziuns sön vëta;
	arjigné na biblioteca spezialisada por stüdi ladins;
	fà crësce les relaziuns danter i Ladins dles Dolomites, di Grijuns y dl Friul.

Sit ofizial: www.micura.it