Cronaca dl ativité ~ Ann 2006

	L'füch söl prè de Glira Pasqual

I Stüdafüch da San Ciascian cumpëda incö 42 mëmbri ativs y 2 mëmbri sostegnidus.   Tratan l’ann 2006 se à i Stüdafüch incuntè indüt pur bëgn 57 iadi, de chisc 12 iadi pur intervënc de vigni sort, 18 iadi pur proes, 7 iadi en ocajiun de festes de Dlijia cun prozesciuns o sopoltüres, 13 otes pur sorvisc desvalies y 7 pur sentades dl Ausschuss o di comandanc. 

L’ann d’ativité 2006 mët man sciöche bele tradiziun en la nöt de San Salvester cun l’sorvisc de prevenziun, purtè inant da Pire Agreiter y Christian Obojes. Les proes da d’ainsciöda mët man ai 20 de aurì. Al vëgn tignì 4 proes internes, na proa a San Ciascian cun i Stüdafüch da La Ila, trëi proes cun les mascheres de respiraziun y na proa cun i funk.

Ai 7 de mà festejëia i Stüdafüch so patrono San Flurian. Le medemo dé, da mesa les nü da sëra, sona i pipsri pur jì a daidé i Stüdafüch de Badia pur n inzidënt defora de Punt de Fer. Ai 20 de mà tol pert nosta uniun al dé ecologich, daidan da rumené sö l'paîsc. Incër la mesa les trëi dl 14 de jügn vëgn i Stüdafüch da San Ciascian, La Ila y Badia cherdà dal 115 pur n füch sön n prè da munt püch sura l'rifugio "La Ütia". Chi dis ê dër bogn cialc y i prà â bindebo la süta. Ruvà söl post an podü cunstatè che al vardô l'prè de Glira Pasqual y an à bele da atira odü ite che l'ega ê le maiù problem. Insciö an tut cà naota i 10.000 l de ega che an â ti 3 tank y intratan contatè Carlo Canins, che à atira metü a desposiziun la gran vasca pur l'inevamënt sön Piz Sorega. Söl post él ince i Carabinieri y la Forestale da La Ila, che à musurè jö la spersa de prè vardüda jö. Pur destudé l'füch êl söl post 12 auti di 3 paîsc y 70 omi di stüdafüch, che à laurè pur cuaji 3 ores y adurè 30.000 litri de ega. De fondamentala importënza se à rilevé in chësta ocajiun la vasca pur l'inevamënt sön Piz Sorega plëna de ega y la disponibilité dla sozieté di implanc portamunt.

Ai 25 de jügn festejëia i Stüdafüch adüm ala popolaziun da San Ciascian la bela festa dl Cör de Gejù. L'medemo dé, tratan la sëra di füc, sona la sirene y i pipsri pur n füch tla fraziun Suracianins. Ruvà söl post vëigon che al se trata de n gran müdl de lëgna che verd sot ala majun de Sorarù Franz. A gauja dl vënt che sofla chëla sëra él prigo che les flames pois impié les ciases y les majuns incëria. L'füch vëgn atira destudé.

Ai 2 de lugio él söl program la tradizionala Maratona dles Dolomites; 6 porsones tol pert a chësta manifestaziun daidan söles incrujades. Ai 19 de agost incër la üna da misdé sona i pipsri a gauja de öl söla strada provinziala tla zona dl Camping Sass Dlacia. Ruvà söl post vëigon che la strisciura de öl mët man dan la plaza da parché de Sciarè y se rüva fora söl punt dan l'Camping. Sis porsones laora cuaji 3 ores alalungia pur rumené adüm cun le saurun aposta la strisciura lungia 200 metri y lergia 40 cm. Incër les sis da sëra dl'dé dô, ai 20 de agost, vëgn i Stüdafüch cherdà söi pipsri dal 115 pur n lëgn che füma tumé avisa söi cabli dl ENEL sot a Ciampidel. Nü porsones rüva adüm y söl post vëigon atira ite che an pò fà nia y gnanca jì purmez cina che i lauranti dl ENEL ne é nia söl post. Intratan che an aspetâ i lauranti dl ENEL, él ince saltè l'cabl lascian tumè l'lëgn.

Ai 24 de agost da misdé chërda l'115 tres i pipsri pur jì sö a Dlira, ulache al doss ester fëgn che brô te na majun. Atira vëgn ince cherdà i Stüdafüch da San Laurënz cun les sondes y la mascin aposta pur desfridé y destudé l'fëgn. Pur furtüna é la temperatöra dl fëgn a post y al ne sozed nia ater. Ai 7 de setëmber da misdé vëgn i stüdafüch cherdà pur n inzidënt defora da Tamures, ulache al é jü a d'abrodores n tractor. L'bacan à albü na gran fortüna dal mumënt che al ne ê nia laite canche al ti é pié ia la mascinn. Ai 18 de setëmber mët spo man les proes da d’altonn. Al vëgn tignì 3 proes internes, üna na proa a La Ila, üna na proa a San Ciascian cun Curvara, üna na proa de düta l’Alta Badia a Badia, dües proes cun les mascheres de respiraziun y na proa cun i funk.

Pur ci che reverda la partecipaziun ai cursc a Vilpian, pon dì che l’interesc é ince tl 2006 stè bindebo alt. Moling Armin, Irsara Ugo y Pedratscher Alex à tut pert al curs pur mascheres de respiraziun, Rudiferia Alex al curs pur l'nü software de gestiun dles ativitês y al curs da scrivan, Agreiter Ivan al curs de basa pur intervënc da destudé y Rudiferia Mirko al Gruppenkommandantenlehrgang.

Da setëmber incà é i stüdafüch da San Ciascian ince presënc te internet söla plata dla Cassa Raiffeisen www.ValBadiaonline.it pro les atres uniuns dla valada. Chilò pon ciafè les croniches di ultimi agn y n articul söla storia y la vita de San Flurian.

Fora de chisc intervënc é i stüdafüch gnüs cherdà plü iadi por de atri pici intervënc tecnis, sciöche daurì portes, pumpè fora cianôs o despifé condütes dal ega.   Ince pur atri sorvisc de vigne sort vëgn i stüdafüch aldédaincö cherdà plö gonot. Chilò tomel ite i sorvisc da parchè tratan manifestaziun desvalies, sorvisc pur riprejes televisives de films y reclams de auti y atri. Deplö è spo stades les sentades a chëles che raprejentanc di stüdafüch à tut pert, insciö sentades internes, dl “Bezirk Unterpustertal” y dl “Abschnitt Alta Badia”.

Por düc i sorvisc che i stödafüch pita y pitarà inant ince tl dagnì al paîsc y por la segurëza ch’ai ti garantësc ala popolaziun tratan döt l’ann ti é düc dër reconoscënc.