Home
Noeles

Spetacul artistich “AKASHA – La Quintessenza” a Corvara

En chësc isté vëgnel tigní por le prüm iade n spetacul artistich tl stade dla dlacia a Corvara. En lünesc ai 14 d’agost sarale i acrobac dla compagnia Stardust che porta dan n spetacul basé sön i cater elemënc primordiai: füch, tera, ega y aria. Tratan l’esibiziun vëgnel presenté las carateristiches tan atramënter de chisc cater elemënc, che vëgn impó liá y alzá fora dala forza dl ecuiliber universal insciö da cherié do la minunga di alchimisć n cuinto elemënt: l’eter. Le spetacul mët man dales 21:15 cun elemënc de füch y scraianc, che rapresentëia le caos primordial por mostré spo cun ritms y sonns desvalis i cater elemënc te dütes sües formes. Tl’ega podaran amiré sirenes che bala, tl’aria sarale acrobac che mostra esibiziuns che lasciará le publich sënza flé, le füch sará rapresenté cun chentli y cërtli impiá y imajes dla tera y dla natüra gnará mostrades te n spetacul de lüms y corusc. Les chertes por tó pert al spetacul pon cumpré ti ufizi turistics dl’Alta Badia al prisc de 12€ por i adulc y 8€ por mituns cina a 12 agn.

valutaziun
Submitting your vote...
stampè