Home
Noeles

Notizies dal Aiut Alpin Dolomites

Ntan chësc instà se à auzà l joler dl Aiut Alpin Dolomites bel 195 iedesc dala zentrela a Pontives per purté aiut a alpinisć n dificultà , ferì o ënghe per emergënzes saniteres.

Na desgrazia ie suzeduda n dumënia sun la Marmolata ulache 2 turisć de Cervia y Bologna ie unì tuchei da n tarlui ntan che i fajova la ferata de Punta Penia.

3 dumandes n chësc cont a Raffael Kostner diretëur tecnich dl Aiut Alpin Dolomites

Dumanda : co ie pa suzeduda chësta desgrazia ?

Raffael Kostner : La desgrazia ie suzeduda feter suinsom dla ferata ulache 2 alpinisć dla talia fova ruei te n gran temporal. L ël de 49 ani de Cervia ie unì tucà de plën da l tarlui y ie mort sun l colp. Plu fertuna à abù l ëila de 42 ani de Bologna che l tarlui à ënghe tucà ma nia de plën y la se la à mo caveda a cherdé aiut tres l fonin. Per rué sun l post dla desgrazia iel stat dassënn periculëus ajache l fova n gran vënt y l pilot se à stentà dassënn a tenì fërm l joler y l julé a destinazion per pudëi recuperé l ëila ferida y l mort.

Dumanda: La previjions meteo udova dant l pericul de gran temporai ma mpo se à i 2 resià a fé la ferata:

Suënz suzedel che chisc alpinisć ruva te nosc raions mé per un n dì y ëi ne sa nia avisa coche l sarà l tëmp te nosc raions do che te i luesc ulache i stajova ne fovel deguna previjions de temporai . Nscila scumëncia i turisć a fé la ferata o na arpizeda y ruva te i temporai. Nscila iel ënghe suzedù for l medemo dì a n alpinist y na alpinista Tschecha, che fova tl lëur de fé la ferata Eterna tl raion dla Marmolata. Ëi fova furnì dut auter che da mont cun na brea curta y puecia njinies per fé na ferata. Canche l ie ruà l temporal ai crì sosta sota n sas, te n busc y à cherdà aiut. Ënghe te chësc cajo fovel scialdi periculëus a julé y nscila ie jic sun l post 2 judacrëp a pe y les à purtedes al segur. Te chisc caji ie nia mé n pericul la vita de chi che chërda aiut ma ënghe de i socoriteures.

Dumanda : Co dëssen pa se cumpurté n cajo che n ruva te n temporal sun na mont o sun n crëp?

Raffael Kostner : Dantaldut dëssen cialé de nia se fermé sun piza ma jì ju plu che la va. Canche n ie pona tl temporal dëssen se taché cun na corda ntëur a n majer sas pervia che sce l tarlui da ju daujin se giaten na gran scasseda y n pudëssa tumé ju plu lonc. Drët iel ënghe se delibré de dut chël che n à de mitel. Da la njinies per jì a crëp y la cosses persuneles che pudëssa tré l tarlui coche l ëura o culanes. L miëur cunsëi ie de se cufé ju te n post segur y aspité che passe l temporal. A se cufé muessen meter la giames adum pervia che sce n à la giames adalerch o n fej de gran vares ie la puscibilità che n vën tuchei majera.

Ora de chësc ntervënt iel mo stat truepa cherdedes per alpinisć n dificultà o ferì. Danter l auter per n arpizadëur che fova tl lëur de se arpizé sun la " Grosse Mauer " de Sas dla Crusc. Tl segondo trat ie crëpa ora n grif y ël ie tumà ju per plu metri se fajan bëndebò mel a l cë y a na sciabla. Ël se arpizova cun si cumpani che à udù ciche fova suzedù y à riesc cherdà aiut. L se trata de n parei scialdi vertical y nsci an n iede lascià l dutor japé dl parei y n à anjenià ca duta la njinies tl joler per pudëi l recuperé. Cun l joler plu lesier an lascià ju n judacrëp da l joler cun na corda de 90 metri y nsci ie l judacrëp ruà permez a i 2 jëuni. Un al iede i an pona trac su tl joler y n i à julei nchin japé dl parei ulache l dutor ti à pona dat la prima medicazions. N auter ntervënt fova sun Pordoi tla via della Galleria ulache 2 ëi de Südtirol ne fova nia plu bon de jì inant y à cherdà aiut. L se tratova tlo de n ntervënt scialdi tecnich fat cun la binda de 70 metri. N ti ruova mpo nia permez y nsci an ntant cherdà i judacrëp de Fascia che dassova jì su a pe pervia che l univa scur. Ma dan la dé su an mo n iede purvà cun na binda de 73 metri y n ie stac boni de tò ora de parei i 2 alpinisć y i mené al segur . Sun la via de i ciamins tl prim Ciampanil dl Sela fova n alpinist tudësch che ie unì tucà da n gran puron y se ova rot na ciavidla. Ora de chël fovel mo autri ntervënc che ne fova nia tan de prëscia.

valutaziun
Submitting your vote...
stampè