Home
Noeles

Jita di mëmbri dla Cassa Raiffeisen jö tla laguna d’Aunejia

En sabeda, ai 30 de setëmber, á 24 mëmbri dla Cassa Raiffeisen Val Badia podü tó pert cun so partner ala jita jö tl bel raiun dla laguna d’Aunejia.


Sciöche bele i agn passá, é chësta jita gnüda organisada por chi mëmbri che á albü la fortüna da gní trac fora en gaujiun dla sentada generala di 28 d’aurí 2017. En chësc ann é le grup di mëmbri jü cun le Presidënt y le Diretur dla Cassa jö cuntra Aunejia a fá na roda tla laguna.

I sun piá ia dadoman cun le bus y do n bun gosté sunse rová a Portegrandi, olache na barca resservada por nos s’á acompagné cun so capitan ite danter i socrëc dl rü Sile cina tla laguna d’Aunejia cun sües isoles. L’acompagnadú s’á cunté la storia dl rü che rogor fora por le raiun dl parch natural regional y s’á mostré la gran varieté dla flora y dla fauna. Le capitan nes á ince cunté dles ligrëzes y fadies dla jënt da zacan y da incö che viô y vir dales perts de chësc rü.

La pröma tapa é stada l’isola de Burano, conesciüda por sües ciases dër da corú y por la lauraziun dl zaindl. Al ê dër interessant da rodé y da odëi les beles botëghes artejanales, n’aprofitan ince dl bel tëmp che s’á acompagné döt le de.

Dedô sunse jüs cun la barca cina sön l’isola de Torcello, olache al s’è gnü tenü sö na buna marëna de pësc te n restaurant dër conesciü dal inom “Al Ponte del Diavolo”. Do marëna s’á l’acompagnadú condüt ite tles coriosités de chësta isola, pian ia dala liënda de “Ponte del Diavolo”. I sun spo jüs a vijité la basilica de Torcello y al nes é gnü cunté che aldedaincö virel ma plü 17 porsones sön chësta isola, mo ch’ara é stada öna dles prömes isoles dla laguna da gní abitada. Vigni ann vëgnera vijitada da tröc turisć, dantadöt por so patrimone archeologich.

Dales 18.30 sunse indô piá sö cuntra la Val Badia. Ala fin dl bel de á le Presidënt dla Cassa Raiffeisen Val Badia ciamó n iade tut la parora por rengrazié i sozi dla bela compagnia y dla buna colauraziun.

valutaziun
Submitting your vote...
stampè