Home
Noeles

Mostra fotografica „Demënza – La responsabilité de fá valch“

Le Raiun Sozial Val Badia en colaboraziun cun l'assoziaziun ASAA – Alzheimer Südtirol Alto Adige organisëia na mostra itinerënta de fotografies dal titul „ Demënza – La responsabilité de fá valch“. Le fin é de trá l'atenziun y la cosciënza por porsones cun demënza. Al é le früt de na colaboraziun strënta danter doturs, personal soziosanitar, infermiers, parënc y amisc che fej le guern a porsones atocates y mët adöm retrac y tesć realisá por chësta iniziativa. Chisc dess invié a sté chic, a nen baié, a tó demez tëmes, a lascé pro tabus sburlá sön na pert, desfanté clichés y a porté le vijitadú a ti ciaré ala maratia da n ater punt de odüda. Por i dui fotografs auturs dla mostra, Manuela Tessaro y Alberto Franceschi, él fondamental da ti lascé ales porsones süa dignité y la mëte al zënter dl'atenziun por fá n punt danter l'osservadú y chël che vëgn osservé.

La mostra, che é gnöda metüda fora le pröm iade tl 2014, fajerá staziun, do i ot posć olach ara é bel stada, te Raiun Sozial Val Badia a Picolin dai pröms de novëmber 2017 cina ai 31 de jená dl 2018. La daurida ofiziala é preodöda en jöbia, ai 9 de novëmber dales 19.00 cun n referat dal titul „Cualité de vita cun demënza – i compic dla assoziaziun Alzheimer Südtirol Alto Adige“ tigní da so presidënt Ulrich Seitz.

Le moto dl'assoziaziun „Nos ne lasciun i familiars nia da susc!“ dess ince ester la rajun por sté dedô n pü' adöm a se bëire val', fá domandes y se baraté fora esperiënzes.

Düc é dër bel inviá.

valutaziun
Submitting your vote...
stampè