Home
Noeles

Rait de San Linert dles valades ladines

En domënia ai 5 de novëmber éle gnü tigní la 19ejima ediziun dl Rait de San Linert dles valades ladines a Badia. La festa á metü man cun la santa mëssa dales 09:00 tla dlijia de Badia en onur de San Linert, ciantada dal cor de dlijia de Badia. Ince sce les previjiuns dl tëmp ne ê nia dles mius éla impó jüda da fá la defilada, a chëla che al á tut pert trö ciavai de raza haflinger y norics sciöche ince les güces y i ciars infornis sö da festa y la jënt cun i guanc tradizionai. Les müjighes da Fodom, Jenesien y Badia á abelí la defilada cun sües melodies y sambëgn ne ale nia mancé le ciar cun de vigni sort de patüc da mangé, che é gnü venü da pert dla uniun dles ëles dala troht. Sön un di prüm ciars an podü amiré la statua de San Linert, patron dl paisc y protetur di ciavai a chël che la festa ti vëgn dedicada. Do la defilada éle gnü perié do la benedisciun di tiers y de sü patruns sön podium adüm al degan Siur Iaco Wendelin Willeit.

La festa é jüda inant tl salf dles manifestaziuns, olache le Bal Popular Val Badia á presenté süa esibiziun. Dedô an podü ascuté sö i conzerc dles müjighes da Jenesien, Fodom y la Böhmische de Badia. La serada se á stlüt ia cun le grup “I Ciastelans” y n bun tai de ciastagnes.

Le comité organisatif é sté dër cuntënt por ciche reverda le garaté dla manifestaziun y la tröpa jënt che é gnüda ince dalunc adarlerch a ti ciaré ala defilada. Sëgn vëgnel bele ponsé al’organisaziun dl’ediziun da en ater ann. Por le 20ejim iubileum dl Rait de San Linert dles valades ladines éle gnü ponsé da invié ciavai da vigni pert de Südtirol.

 

Al vëgn ringrazié la regiun Autonoma Trentin-Südtirol, le Comun de Badia, l’Assoziaziun Turistica de Badia, la Cassa Raiffeisen Val Badia y la dita Forst por le sostëgn finanziar.

valutaziun
Submitting your vote...
stampè