Home
Sorvisc

200 agn Friedrich Wilhelm Raiffeisen

Ai 30 de merz 2018, dan 200 agn, él nasciü Friedrich Wilhelm Raiffeisen, le fondadú dl’idea dla cooperaziun. Cun sü prinzips dla solidarité y dl aiüt un por l’ater, él sté bun da mioré la vita y l’economia dla jënt cina aldedaincö.

Friedrich Wilhelm Raiffeisen y süa idea

La sensibilité por i bojëgns dla jënt y l’intenziun da mioré les condiziuns soziales y economiches ti á dé a Friedrich Wilhelm Raiffeisen, dan 150 agn, l’idea y l’abilité da motivé sü conzitadins da se daidé instësc y da surantó responsabilité un por l’ater, arjunjon deboriada traverc, che porsones da sores n’é nia bunes da arjunje.

 

L’assoziaziun „Brodverein“

Friedrich Wilhelm Raiffeisen é nasciü ai 30 de merz 1818 a Hamm an der Sieg tl raiun de Weserwald a nord de Koblenz. L’invern 1846/47 êl salté fora, por gauja de na stleta racoiüda, na ciarestia che ne sconâ gnanca la jënt da paur. Sön chësta â Friedrich Wilhelm Raiffeisen, che ê ombolt de Weyerbusch, fondé  l’assoziaziun „Brodverein“, che cumprâ ite alingrossa somënza de blâ a n bun prisc por la dé inant bunmarcé ai paurs. Insciö ê chësta assoziaziun stada buna da ti assiguré le suravire ai paurs.

 

„Hülfskasse“ – Cassa d’aiüt

Incorajé da chësc suzes â Raiffeisen fondé ciamó d’atres assoziaziuns che se basâ sön le prinzip d’assoziaziun y da se daidé deboriada. Cun l’istituziun de na „Hülfskasse“ (de na cassa d’aiüt) êl sté bun da jí cuntra le sfrutamënt di usurars, che parâ i paurs ti debic y te lizitaziuns sforzades. Dilan a chëstes assoziaziuns ê tröc paurs bugn da cumpré ciará i armënc ch’ai â messü ti lascé ai usurars por pëgn.

 

L’idea da se daidé instësc

Te süa opera publicada l’ann 1866 „Die Darlehenskassen-Vereine“ â Raiffeisen splighé les lignes fondamentales de süa idea dl autoaiüt. Döt so operé ê intenzioné da alisiré la meseria dla popolaziun da paur, da cherié posć nüs de laur por fanc y fanceles zënza laur. Danter l’ater dô l’istituziun de biblioteches popolares alzé le livel de formaziun y mioré la vita dla classa mesana dla popolaziun.

Canch’al ê mort, ai 11 de merz 1888, ê la fondamënta fata por le gran svilup produtif che l’idea de cooperaziun de Raiffeisen á albü y á dötaurela.

 

www.hamm-sieg.de/hamm/de/Raiffeisenmuseum/

stampè