En dumënia ai 22 de otober él ince gnü tigní a Badia, tla dlijia de San Jaco y San Linert, la festa por i iubilars de matrimone. Tröc pers á tut sö l'invit da pert dl Cunsëi de Cüra de recordé i aniversars, dai 10 cina ai 55 agn de vita deboriada. Chiló recordunse Otto y Frida da Grones che pó festejé chësc ann 55 agn de matrimone, bëgn 5 pers fej noza d'or.

La presidënta dl Cunsëi de Cüra Rita Pitscheider á dit te só salüt ai iubilars che l'ann vá prësc a piz, y nos podun ciaré zeruch a 4 de beles sajuns. I iubilars podess platerné te só liber de vita matrimoniala olache al foss tröp da lí:  "Tröp de bun y de bel mo ince val mumant sfadius y nia saurí da tigní fora. L'altonn é pö la sajun di früc, os podes incö ti surandé al Signur düc ösc früc, Ël fajiará adinfora val de bel. "

Siür degan, Jaco Willeit, á intertan süa perdica sotrisse l'importanza y la valüta de chësc sacramënt.

L'mumënt dl ofertore é ste dër simbolich y rich de impresciuns. Valgünes copies á porté dan alté cosses che raprejentëia la vita deboriada, mo ince che an adora por jí sigüsc y cun forza sön chësc trú. Al é gnü porté n rucsoch cun l'proviant che adorun por nosta vita, mo ince sciöche sëgn de aventüra y de vöia da ji tres indo sön strades nöies. N per á porté sö na corda da arpizé, te chëla pon se tigní toch, cis ti mumanc plö ërc y prigorusc. N ater per á porté sön alté n ro da ciaré da lunc, chësc se dëida ödëi fora plö avisa les piceres cosses importantes che fej tan bela y de significat nosta vita. Al é gnü porté sö na cherta orafica, che é n simbol de orientamënt, sigurté, aiüt y speranza pur arjunje l'travert. La Bibbia y na ciandëra impiada, la Bibbia é l'liber dla storia d'amur de Chël Bel Dî por vignun de nos, al é sciöche na lüm che slomina por se mostré l'trú de nosta vita. L'ultimo per á porté sö l'pan y l'vin: ai é l'resultat de n grüm de graní metüs adüm y de bosures de üa unides danter ales, ai é sëgn de uniun y se inviëia a fa comeniun tla Santa Eucaristia, deventan pur nos spëisa y boanda de vita eterna.

La mëssa da festa é gnüda abelida dal Cor Kerygma y da n grüp de Ëi de Badia sot ala direziun de Agnes Irsara, al orghe unse aldí Andrea Tasser. Do mëssa é la festa jüda inant cun n pice rinfrësch tl local di ministranc.

Karin, por l'Cunsëi de Cüra de Badia