Home
Noeles

Notizies dal Aiut Alpin Dolomites

Da chëst ena inant ie l joler cueciun EC 135 dl Aiut Alpin Dolomites n manutenzion pervia che n à passà via la 550 ëures de jol ntan chësc instà. Per garantì inant l servisc de socors se an mprestà n joler da l ÖAMTC dl Austria. L se trata tlo de l joler che l Aiut Alpin ova nchin che n à cumprà l nuef. Canche n l ova vendù oven metù ite tl cuntrat la tlausula che n cajo de bujën possen se mpresté chësc joler. La desferenzià ie mé l culëur che ie sënn ghiel y n à messù meter leprò la binda. Chësc fova nchin sënn de servisc a Dispruch cun la imatriculazion OE XVD.

Chisc dis iel for inò unì damandà l socors cun l joler y perchël fova chësta dessegur la drëta dezijion. Te 2 caji ne n à plu juà nia l ntervënt de prëscia. Te un n cajo se tratovel de n Russ che fova sbriscià ora sun la ferata Tabaretta che ie te Sulden. Ël ie tumà ju plu metri se mazan sun l colp.

L segondo cajo ie suzedù sun la Oberhauseralm sëura Lüsen. N ël de 73 ani fova tumà ntëur zënza de plu batimënt. Ënghe sce n à purvà a l reanimé per feter n ëura iesen nia stac boni de l tenì n vita.

Scialdi mel se a fat n ël de Steinegg:Ntan che l taiova lëns iel stat tucà da n lën. Ël fova a mesa l bosch y nia saurì da udëi. L ël de 67 ani an tacà tla binda per l julé ora de l bosch y do che n ova inò dat sëura l an ciarià te l sach vacuum per l julé do chël de prëscia te spedel.

Te 2 caji fovel da purté aiut a persones che se ova perdù. Un n cajo ie suzedù tla Val Duron: n israelian fova jit a fé na jita cun si 2 pitli mutons. Tres la coordinedes GPS i an prësc abinei y julei al segur.

L auter ntervënt fova te Val. Sota la furcela Ciampei fova n ëila spriguleda ajache la se ova falà y savova nia ulache la ie. Per cajo ie passà n iagher che la à calmeda y cherdà aiut. Cun l joler la an juleda nchin te Val.

Ënghe te n auter cajo fovel da julé a purté aiut zënza per fertuna che zachei se ëssa fat mel. La cherdeda univa dal Grohmann tla grupa dl Saslong. 3 alpinisć fova piei su l dì dant y se la à nia fata a unì ju per tëmp. Nsci ai passà la nuet tl crëp. Un de i 3 ne se la cavova a deguna maniera a jì inant perchël a ëi cherdà l joler che ie ënghe muet a i tò ora dl crëp. I 3 an tacà te la corda sota l joler y julei al segur sun jëuf de Sela.

Chisc dis an ënghe nuzà per fé na proa cun socoriteures dla protezion zivila de Persenon. Chësta proa an fat tl lech artifiziel sun mont de Sëuc ulache n à simulà n ntervënt per persones jites sot l lech. L joler ie julà sëura l lech y i somozateures ie sautei ora dl joler fajan n saut de n 4 metri. Dut à drët butà.

 

 

valutaziun
Submitting your vote...
stampè