Home
Noeles

Jita di mëmbri dla Cassa Raiffeisen Val Badia 2018

En sabeda, ai 6 d’otober 2018, á 29 mëmbri dla Cassa Raiffeisen Val Badia podü tó pert cun so partner y cun le Diretur y le Presidënt dla Cassa ala jita tradizionala di sozi.

Chësc ann sunse jüs a vijité le tunel de basa dl Brenner. Incer les 9 da doman sunse rová ia dala  Fortëza de Franzensfeste olach’al s’aspetâ bele l’ing. Daniel Alfreider che s’á dé informaziuns de pröma man sura chësc proiet y che s’á acompagné ince ite tl tunel. I sozi á naota podü vijité le infopoint dl BBT y odëi n per de filmac sura le tunel, sciöche le proiet é pié ia, tan inant che i laurs é bele y ci ch’an s’aspeta por le dagní cun la conclujiun de chësta opra. Dedô sunse jüs cun le bus ite por le tunel, incër 800 metri sot tera,  y i un podü odëi dal vi l’areal de costruziun de chësc coliamënt sot tera che é le plü lunch dl monn.  La marëna s’é gnüda pitada sö te n ciastel alalt sura Balsan y plü avisa sön la Haselburg. Do na picia spazirada inanter les vignes é i sozi rová sö dal ciastel cun na odüda demorvëia sön la cité de Balsan y la Val dl Adesc. Chiló s’él gnü tenü sö tla curt dl ciastel l’apertif y na buna marëna pro vins dl post ti bi salamënc nobli dla fortëza. Domisdé sunse indô jüs cuntra Porsenú y plü avisa tl Convënt  da Neustift. Impröma sunse spazirá por les vignes y spo s’á l’acompagnadëssa splighé le laur tles vignes y la fermentaziun dl’üa. Dedô uns ince podü jí a ti ciaré ala bibioteca, al museum y ala galeria de chedri. La jita s’á spo stlüt jö cun na ciastagnada te n lüch da paur sura Vahrn. Cun de buna spëisa da zacan, n gote de vin nü y n per de ciadins de ciastëgnes pro le sonn d’orghi da man s’á stlüt jö le bel de en compagnia.

Insciö sunse indô gnüs cun le bus cuntra ciasa tla Val Badia olache le Diretur á ciamó tut n iade la parora rengrazian i sozi dla buna colauraziun cun la Cassa Raiffeisen Val Badia.

valutaziun
Submitting your vote...
stampè