Home
Noeles

Condüta dla forza eletrica dla Val Badia sot tera: plü segurëza

La Junta provinziala á mudé d’ofize i planns urbanistics di Comuns de San Martin, La Val y Badia por conzede da mëte la condüta dla forza eletrica sot tera.

La condüta dla forza eletrica alta da 20kV danter les cabines “Idr. Preroman” y “Zija” tla Val Badia é gnüda danejada de plü iadi tl passé da lëgns tomá do novüdes y porchël vál debojëgn da la mëte sot tera. La Junta provinziala á confermé l’arat positif dla Comisciun natöra, paesaje y svilup dl teritore por ci che reverda na mudaziun di planns urbanistics di Comuns de San Martin, La Val y Badia che prevëiga l’inserimënt ti planns de na condüta dla forza eletrica sot tera. Chësta opera é de interes provinzial. “I dui vantaji prinzipai dl spostamënt é da öna na pert la metüda en segurëza dla condüta dla forza eletrica y dal’atra pert la sconanza dl paesaje tres la demoliziun dles infrastrotöres sura tera”, spliga l’assessur por l’ambiënt Richard Theiner.

La condüta dla forza eletrica sot tera gnará metüda diretamënter dlungia la strada statala dla Val Badia. Al gnará ince realisé n pilaser che mancia dal selezionadú “Pidrò” cina ala condüta tl’aria dla tenjiun mesana “Fornaccia”, che ará spo la funziun de coliamënt cina la cabina “Zija.” Implü gnarál realisé na cabina eletrica nöia tla localité Palestrong, da chëra che al passará le strom por les zones d’abitaziun tles vijinanzes. Al gnará tut demez la condüta dla forza eletrica sura tera de 5,5 chilometri cun 61 pilastri y n post de trasformaziun.

La dezijiun é gnüda tuta do che la deliberaziun de scomenciamënt dla prozedöra de mudaziun dl PUC é gnüda publicada ai 10 de setëmber por 30 dis ti Comuns interessá zënza che al sides gnü presenté osservaziuns o propostes.

Ince la Comisciun natöra, paesaje y svilup dl teritore, la Comunité raionala dla Val de Puster y na seria de ofizi provinziai competënc (Ofize Bëgns architetonics y artistics, Ofize Bëgns d’archaologia, Ofize Sistemaziun di rüs Est, Sorvisc strades Val de Puster, Ofize Sconanza Eghes, Ofize Geologia) á bele dé jö so arat positif.

valutaziun
Submitting your vote...
stampè