Home
Noeles

Notizies dal Aiut Alpin Dolomites

Cun l 7 de auril ie fineda via l atività de socors per i uemes dl Aiut Alpin Dolomites. La urganisazion cun sënta a Pontives pieta chësc servisc for ntan i mënsc de sajion turistica, sibe de inviern che ënghe de instà. Chësta sajion da inviern 2018/2019 ie stata na sajion drët mpeniativa . N ova metù man ai 6 de dezëmber 2018 y n ie ruvei a 547 ntervënc. La scuadra che purtova aiut cun l joler H 135 T3 fova metuda adum da l pilot, n dutor anestesist, n socoriteur che se cruziova de i ntervënc cun la binda, n judacrëp y n patron de n cian da levina che deberieda cun si cian fova anjenià a Pontives per julé pea n cajo che n messova crì vel persona sota la levina. Te chësc inviern iel suzedù 6 de tei caji. Chësc servisc de socors ie unì a sel dé cun l aiut de l SAGF che ie n orgun dla finanza, la polizai, l BRD y l CNSAS .

L Aiut Alpin Dolomites univa cherdà tres la zentrela de socors dla provinzia 112 che coordinova i 3 joleri che ie tla assoziazion de socors Heli. Ntan chësc inviern iesen muec per 62 ntervënc tl scur. Chësc uel dì che n à purtà socors a 62 persones ferides o n dificultà che ova riesc de bujën de n dutor y de rué te n spedel.

Sce cialon inant vel statistica udons che bën 523 ntervënc an fat te Sudtirol, 15 tla provinzia de Belun y 9 tla provinzia de Trënt. Te i spediëi an julà 326 ferì, 188 fova emergënzes saniteres, 6 ntervënc an fat per julé persones al segur ënghe sce i se ova fat nia. Per 20 persones à la sveltëza de vester sun l post cun l dutor plu juà a nia. Plu iedesc an ënghe mo purvà a reanimé l pazient ma zënza suzes. De i 20 morc fovel 15 per emergënzes saniteres y 5 per nzidënc.

Tla statistica de la pruvenienza de chi che ova de bujën de l joler cun l dutor nen n fovel 317 dla Talia y de chëi 188 de la provinzia de Bulsan.119 univa da i paesc tudësc o dal Austria y 104 da autra nazions.

L ie stat na sajion de gran lëur ulache danterite an ënghe for inò fat vel proves cun la grupes dla valedes de l Aiut Alpin .

N gra va ënghe a sponsores y duc i sostenideures che fajan la tessera de seguranza per ëi o per duta si familia a judà dassënn l pudëi jì inant cun chësta urganisazion, cialan ënghe for deplù sun la cualità de chël che n possa pité per salvé vel vita o meter persones ora de pericul de vita.

N à mo n autra ucajion de judé finanzialmënter l Aiut Alpin Dolomites. Tosc iel da fé la detlarazion dla chëutes y te chësc cajo an la ucajion de dé l 5 per mile de chël che n paia ite a na lia de ulentariat. L Aiut Alpin Dolomites ie na tel lia ONLUS , lia de ulentariat. Per chësta sort de sustëni iel mé de bujën de na sotscrizion canche n dà ju i formuleres dla chëutes sun l davani, la chëutes ne vën per chël nia auzedes.

Te chësta enes uniral fat plu lëures de manutenzion al joler y danterite fajeran truepa proves per auzé la profesciunalità de i socoriteures. L atività da instà scumencerà inò ai 8 de juni 2019.

valutaziun
Submitting your vote...
stampè