Home
Noeles

L'aisciöda di Stüdafüch da Badia

Por i Stüdafüch de Badia éle indô stè n'aisciöda plëna d'ativitês en chëst'ann. Dala fin d'aurì y cina
do mez jügn é i stüdafüch gnüs chërda por trëi intervënc tecnics. Laprò ai fat na bela ligna de proes,
dè fora da mangé y boandes da Marcé de Mà y festejè so sant patronn.

 

Festa de San Florian
L'apuntamënt plö important é sambëgn stè San Florian, la domënia ai 5 de mà. En chëst'ann éle stè
na festa n pü particolara. Nianca i stüdafüch plö de tëmp ne se recorda na te novera en San Florian.
Do avëi fat la foto de grup, ad'assosta, é i stüdafüch pià ia en marcia dal magazin cina te dlijia,
olache Siur Degan Iaco Willeit à dit la S. Mëssa en onur dl Sant. La müjiga de Badia à sonè da festa
sotrissan insciö l'importanza che le patronn à por i omi di stüdafüch y por la popolaziun intiera.
Do mëssa s'à düc abiné te magazin di stüdafüch por benedì l'auto nü en prejënza di ghesc, danter
chisc l'ombolt Iaco Frenademetz, l'Ispetur distretual di stüdafüch Elmar Irsara, i mëmbri d'onur dla
uniun y les totes di stüdafüch. Le comandant Walter Valentin à saludé la popolaziun y à cuntè
dl'ativité tratan le 2018. En gaujun dla benedisciun dl auto nü, à i stüdafüch ince ciafè na nöia tota.
Evelin Complojer Irsara dl Gran Ander à surantut l'inciaria de tota dl auto nü. Evelin y süa familia é
tres stà sostignidus dl corp di stüdafüch: l'om Andrea é stè tröc agn atif tla uniun, so möt
Maximilian à fat pert dl grup jonil y le möt Tommy é dötaorela mëmber de chësc grup. A Evelin ti
va n gran giulan por avëi azetè de gnì a fa pert di Stüdafüch de Badia.

 


L'auto benedì y püch dô bele sön intervënt
L'auto nü, n Mercedes-Benz Sprinter Mantra a dopla traziun, é n meso de socurs por intervënc sön
strada y por vigni sort de situaziuns. Al é arjigné ite cun atrezatöra speziala: forfesc y spraiza por
deliberè porsones al prigo, plomac ad'aria por alzè pëisc, cordes y ancoraji por trà pëisc y tröp
d'ater. Deache l'autobot dl ann 1994 ê surafora cun le pëis, êle debojëgn dl'alisiré. Insciö à i
stüdafüch tut la dezijiun de tignì l'autobot ma plö por intervenc da medefüch olache an adora ega y
de spostè l'atrezatöra tecnica te n auto nü. Por ne mëte nia laprò auti, an spo metü la Fiat
Campagnola dl 1965 sciöche oldtimer, che ne po nia plö gnì adorada por intervenc o proes.
Por le finanziamënt à contribuì le Comun de Badia, la Provinzia Autonoma de Balsan, la Cassa
Raiffeisen Val Badia y la Vijinanza da San Linêrt, sciöche ince n gröm de porsones cun sües
spënores de bona man. I Stüdafüch de Badia tol l'ocajiun por ti sporje a düc n gran giulan.

En San Florian danmisdé é l'auto gnü benedì y tratan marëna éle bele jü fora sön intervënt, canche n
grup de Badia à messè jì a La Ila por daidé sön n intervënt tl raiun de Piz La Ila. N iat dala nëi â
rosedè, mo por fortüna ne s'à le sciafer nia fat mè y i stüdafüch à tosc indô podü jì zeruch.

 

Les proes d'aisciöda
D'aisciöda canche les sëres vëgn plö lunges y cialdes tëgn i stüdafüch de Badia na ligna de proes
edema por edema. En chëst'ann an porvè situaziuns de medefüch te Badia, tles vijinanzes y ti paisc
vijins, tecniches por daidé pro inzidënc sön strada, co adorè litres, cordes, mascheres de respiraziun
y ater. Na sëra éle gnü adalerch a Badia le stüdafüch professionist Alex Taraboi a mostrè soluziuns
pratiches por taié n auto pro n inzidënt.
Por che les mascinns y atrezatöres sides tres arjignades, s'incunta i stüdafüch do la sajun dles proes
por mëte a post y puzenè döt avisa. Vigni massaria vëgn controlada y sistemada, denanche la mëte
indô te so post, olache düc sà ince da jì ala tò canche ai l'adora.
Novité de chëst'ann, por stlü jö la sajun dles proes, é na Sëra dla Porta daverta por la jënt dl paisc de
Badia. La popolaziun é inviada la sabeda ai 22 de jügn dales 20:30 te magazin. Söl program éle
deplö desmostraziuns y la poscibilité de ti ciarè a mascinns y atrezatöra di stüdafüch.

 

Gottfried Nagler
por i Stüdafüch de Badia

valutaziun
Submitting your vote...
stampè