Home
Noeles

Paisc en festa a San Ciascian

Le zënter da San Ciascian pita fora por l’isté n domisdé cun musiga, spezialites gastronomiches y divertimënt por mituns.

Ince tartan chësc isté vëgnel metü a jí le “Paisc en festa” tl zënter da San Ciascian. La manifestaziun vëgn organisada cin’iadi fora por düt l’isté, dagnëra de mercui: le pröm iade ai 17 y spo ciamó ai 31 de messé, sciöche ince ai 7, 21 y 28 d’agost. Vigni iade vëgnel tigní dales 16.00 inant n pice marcé de produc dl post y di artejans, abelí dal sonn di orghi da man. De vigni sort de bun patüc da mangé ciafen pro i stand gastronomics dles uniuns dl paisc y de deplö hotí y eserzizi dl post. Ince por i mituns gnaral metü a jí n bel program de intrategnimënt. Adüm al Parch Natural Fanes-Senes-Braies vëgnel organisé le domisdé « Tl rëgn di tiers », n laborator creatif adüm ai verdaparcs sura la flora y la fauna di parcs naturai. Pici y gragn dai 6 agn insö é inviá da tó pert dales 16:00 ales 19:00. Les serades dl Paisc en festa gnará animades da de vigni sort de grups musicai. Tratan le prüm apuntamënt podaran aldí domisdé le duo « Whiskey & Ginger », « Don Cravallo » dales 17 :00 inant y le grup « Da Piz a Ciantun » da sëra.

 

DOMISDÉ DI MITUNS A SAN CIASCIAN

Fora por la sajun da d’isté vëgnel metü a jí le mercui n domisdé di mituns cun laborators didatics y presentaziuns de libri por mituns tl Museum Ladin Ursus ladinicus.

Ai 17 de messé vëgnel tigní la prüma presentaziun dl’iniziativa “Domisdé di mituns - Il libro nella roccia”. Dales 17:00 ales 19:00 gnarale presenté le liber “Il canto del lupo” y dedô podará i mituns tó pert al laborator didatich cun Paolo Ligabue y Matteo Paganin. Les atres presentaziuns di libri por mituns vëgn tignides ai 31 de messé y ciamó ai 7 y ai 14 d’agost. Tratan i atri apuntamënc dl “Domisdé di mituns – Sön les pedies dla laurs ladina” á i mituns dai 5 ai 12 agn la poscibilité da vijité le Museum Ladin y tó pert a deplö jüc y ativites creatives y manuales. Chisc apuntamënc mët man dales 16:45 cina les 18:30 y plö avisa esi en program ai 24 de messé, ai 21 y 28 d’agost sciöche ince ai 4 de setëmber. I mituns é periá da se scrí ite pro l’Assoziaziun Turistica da San Ciascian anter les 16:00.

valutaziun
Submitting your vote...
stampè