Home
Noeles

Stars on Ice

Atlec conesciüs dl jadiné artistich a livel talian y internazional presentará n spetacul sön la dlacia dl stade a Corvara

L’Assoziaziun Turistica Corvara adüm ala sozieté sportiva Ghiaccio Spettacolo mët a jí en mercui ai 14 de agost n spetacul sön la dlacia dal titul “Midnight”. Protagonista d’ezeziun dl spetacul sará la jadinadëssa gherdëna Carolina Kostner, che mostrará sües abilites y süa eleganza sön i jadins. Sön la dlacia dl stade a Corvara sarale ince da odëi le jadinadú Michal Brezina, la copia ruscia Aleksandra Boikova y Dmitrii Kozlovskii y la miú copiá de jadiné acrobatich Anastasia Martyusheva y Konstantin Gavrin. Sambëgn ne manciarale nia atlec taliagn sciöche i campiuns nazionai Charlene Guignard y Marco Fabbri, i vize-campiuns taliagn Jasmine Tessari y Francesco Fioretti, le miú balerin talian de tip tap Tony Buondancer y i susc jadinadusc acrobatics aereal taliagn Alice Velanti y Davide Pastore. Implö tolaral pert al spetacul la compagnia Ghiaccio spettacolo, che é metüda adüm da jadinadusc profescionisć de vigni spezialité dl jadiné artistich. Les chertes de entrada podaran cumpré bele danfora pro i ufizi dles Assoziaziuns Turistiches da Corvara, Calfosch y La Ila y pro le stade dla dlacia al prisc de 25,00€ por i gragn y de 15,00€ por i mituns dai 7 a 12 agn. I mituns cina ai 6 agn pó jí ite debann.

valutaziun
Submitting your vote...
stampè