Home
Noeles

Notizies dal Aiut Alpin Dolomites

Cun l gran muvimënt de seniëures che l ie śën te nosta valedes, iel nce per l Aiut Alpin for inò da muever per ntervënc d'uni sort, de plu n iel nce stat per purté aiut a chi che va a crëp.

N merdi de chëst'ena passeda à la zentrela de Pieve cherdà l Aiut Alpin per julé tl parëi dl Lagazuoi a tò ju n alpinista che ie tumà tla corda. Te 20 metri de binda àn lascià ju l dutor cun l judacrëp y do che chisc à metù l ël ferì tl sach – y chësc te na luegia scialdi ncompra – iesi duc trëi deberieda unic tëuc ora dl parëi cun 30 metri de corda fissa. L alpinista tudësch ie unì menà tl spedel de Bulsan. Da iló demez iesen pona julei ndrët de viers de Mont de Pana, mpue sot a Mont de Sëura, ulache n'ëila de 56 ani de Vicenza ie tumeda ju cun l parapënd. Un che fova sun l lift l'à ududa y à riesc cherdà su l 112 de Bulsan. Ruvei sun l post àn per fertuna udù che la ova mé mel al spinel, ma zënza fòvela bona de muever duta la pertes dl corp. Cun l joler l'àn pona meneda tl spedel de Persenon.

Via n Ciadenac, mpue sëura la "Kölnerhütte" su, te chël pitl parëi che n muessa arpizé sce n uel fé la via fereda dl Santner o l Tschagerjoch, ie n'ëila tudëscia tumeda ju n valgun metri, se fajan dassënn mel al spinel. Ëila ie unida imubiliseda y cun la binda l'àn trata su tl joler per la mené tl spedel de Bulsan. Da sëira àn nrescì che la landa de 55 ani se à rot vel' os dl fil dl spinel y che la univa pona upereda cun n ntervënt drët delicat.

N ie julei sun Jëuf de Fauzares, japé de Sas dla Stria, ulache n arpizadëur se à giapà sasc ados che burdlova ju dl crëp y che ti à gaujà n trauma al cë y ferides tl mus. L alpinista de 53 ani de Ravenna ie unì trat su tres hovering tl joler y menà a Belun te spedel per la cures aldò.

Te Val te Sëlva iel unì cherdà danter l auter nce i Judacrëp per n ël de 35 ani de Gherdëina, che ie tumà ju n diesc metri tla palestra de arpizeda che ie iló. L se à batù su dassënn, danter l auter minova l dutor che l se ebe nce rot l os dla giama y dla cnodla. Cun l joler ie pona l desfertunà unì menà tl spedel de Persenon.

N sada bele daduman abenëura fòvel da julé sun Piz Ciavazes, ulache n alpinista polach de 42 ani ie tumà ju n trënta metri tla via Pit Scubert. N à lascià ju dal joler l team de sucors y do avëi stabilisà l pazient, che ora dla cunseguënzes tipiches de canche n toma tla corda ova mo da ciampì cun na drëta scasseda al cë y n trauma al piet, l àn trat su tl joler y menà a Bulsan te spedel.

Na turista de Bologna àn messù jì a tò sun la pert a sud dl Piz Popena, sun la via fereda "Cengia Gabriella", ulache la ie sbrisceda ora y se à rot l os dla cuessa. N la à ciarieda tl sach y tacheda te na binda de cin’ metri per la mené al segur y dopro nchin te spedel a Burnech.

Per n alpinista tudësch de 43 ani che se à fat de drëta paches a tumé tla via Stabler tl Ciadenac, se àn permò damandà l di do l aiut dl joler, per l mené dala utia Gartl/Re Alberto ju tla valeda, ulache na ambulanza l à pona menà te spedel a Bulsan per na vijita plu a puntin.

Sa la hutia Grasleitner tl Ciadenac iesen nce julei per n arpizadëur che ie tumà tla corda per n 10 metri, se rumpian bonamënter n valguna rëpes. Cun l aiut de si fëna iel mo stat bon de unì ju, ma ruvà pra utia àl giapà tan n gran mel y à pona cherdà l joler, che l à menà riesc tl spedel de Bulsan.

Sun Sëurasas, sun la furcela Ciampai y te Tramans fòvel da jì a tò de tei che se à ntort dassënn o rot na ciavidla o n jenodl.

De tei che ie tumei cun la roda se fajan mel dassënn iesen jic a tò sëura la utia Sesvenna deberieda cun i Judacrëp de Mals, te Ncisles, sun la streda da Monte Piz ja Bula n mut de 17 ani y a Urtijëi n ël de 55 ani che sta via n Sureghes.

De plu ie inò stac i ntervënc per problems de sanità, per caji de bot y la gran pert iesen ruvei per tëmp y ëura y ie stac boni de ti salvé la vita. Massa tert ie ruvà uni aiut per n ël de 77 ani de Badia, ulache l dutor dl Aiut Alpin à mé plu pudù cunstaté la mort. Mé per la cunstatazion dla mort, ajache l ne fova da abiné degun auter dutor te duta la val, ie l dutor dl Aiut Alpin nce unì cherdà sun Pralongià, ulache i Judacrëp dl’Alta Badia à giatà, purtruep bele mort, l laurant fulestier che manciova bele dala sëira dant.

Per desgrazies sun streda ie l Aiut Alpin unì cherdà trëi iedesc chëst’ena passeda y nce per n paur de Meransen che ie jit a berdoles cun l tractor. Ël ie mo stat bon de se n jì a cësa a pe, ma sun la sëira ti jìvela for plu stleta. I uemes dla Crëusc Blancia ruvei sun l post se à ntendù che la situazion fova plutosc periculëusa y se à damandà l joler. Cun rëpes rotes, bonamënter nce n doi birbli japé dl spinel y n pitl Pneumotorax ie l ël unì menà cun l joler tl spedel de Bulsan.

valutaziun
Submitting your vote...
stampè