Home
Noeles

Sëra a löm de ciandëra

A San Ciascian vëgnel metü a jí na sëra te chëla che le zënter dl paisc gnará iluminé unicamënter da chentli y ciandëres insciö da podëi se gode i curusc dl cil plëgn de stëres. Le lünesc ai 19 de agost podaran spaziré fora por le zënter stlüt al trafich y sënza iluminaziun eletrica, se rilasé y ascuté sö les melodies acustiches dl grup JEMM Music Project. En ocajiun dla « …sëra a löm de ciandëra », che mët man dales 21:30, gnarale dé fora spezialites gastronomiches, arjignades ca sënza anuzé l’eletrizité, sciöche tais frëic, spezialites ladines y val‘duciaria. La serada gnará ince animada da deplö artisć: Miss Monik y Miss Paola tëgn n spetacul de füch, i spüdafüch Mr. Skizzo y Mr. G sön les giames de lëgn lasciará le publich sënza flé cun sües esibiziuns y Mr. Rubino tëgn n conzert cun i goti de cristal. Düc i abitanc de San Ciascian é bëgnodüs a tó pert ala manifestaziun, destudan les lüms dales 21:30 ales 23:30 y iluminan les ciases ma cun ciandëres. La manifestaziun dess ince ester n pice contribut ala natüra, sparagnan energia y smendran le pëis visif y acustich por l’ambiënt. Por chësc motif é la manifestaziun ince gnüda reconesciüda sciöche « going green event ».

valutaziun
Submitting your vote...
stampè