Home
Noeles
Manifestaziun

Festival Alta Badia Balance 2019

Paisc: San Ciascian
Data/ora:
  • 12.09.2019 - 20:00
  • 13.09.2019 - 20:00
  • 14.09.2019 - 20:00
Organisadù: Norbert Niederkofler, Dieter Theodor Schall, Akiko Stein, Janel Smith, Christian Trebo, Francesco Bariletti, Egon Castlunger, Roberto Pavan, Alessandr

3a ediziun dl festival Alta Badia Balance, dediché al bëgnester, a la sanité y al ecuiliber tla vita da vigni dé dai 12 ai 15 de setëmber 2019 a San Ciascian.

4 dis, 4 tematiches (IMPAT, ARMONIA, ELEMËNC Y ENERGIA) y na esperiënza de 16 ativitês che fej lüm sön metods, pratiches y argomënc che dëida da vire sagns, contënc y ecuilibrà.

Al gnará pité workshop y seminars de vigni sort basá sön la tematica dl dé, ativitês pur mituns y families (sabeda 14/9 y domënia 15/9) y al gnarà pité tratamënc de vigni sort dales h10:00 ales h22:00.

Al gnarà adarlerch referënc internazionai sciöche Akiko Stein, studënta de Masaru Emoto che baiará dl ega y de süa memoria. Le Dr. Prof. Dieter Theodor Schall, n fisich che se lascia sö cun la tematica dl energia sciöche eletrizité y energia vitala da n punt de odüda scientifich. Al sarà cun nos ince le Chef Norbert Niederkofler che tignarà n seminar sön l aliment-AZIUN y sciöche nosta manira de consumé po fa la desfarënzia. Baiaran de agricoltüra biodinamica, impararan da fa füch y al gnarà fat workshop pur laoré sön se instësc y sön l armonia te nos y cun i atri.

Le vëindres sëra sonaral Gabi & Claire y le grup Gota. La sabeda sëra sonaral i Nothing About Trains da Gherdëina, Gabriele Grieco da Trieste y i Louis and The Space Travellers. La domënia da marëna sonarâl spo ciamò Perin & Barbarossa. Al gnarà pité de bun patüc da mangé y da bëir.

L entrada é lëida, i workshop sarà dales 9:30-12:30 y dales 14:00 ales 19:30 da sëra.

Val workshop sarà debann o cun spënora lëida y atri workshop arà n cost de partezipaziun.

Por chi che ò fa para a düta l Esperiënza Balance, saral la poscibilité da cumpré n ticket pur düc i dis y düc i workshop, o pur n dé spezifich danfora, sparagnan sön le cost di workshop al festival. Info sön la plata web dl festival www.altabadiabalance.com

I se aspetun in tröc cun la bona lüna y cun l intenziun de fa na bela festa. Sce gnis a se ciafé prëibel respetede nosc impëgn y orenté de fa na manifestaziun tla pêsc y tl respet dla natüra y le bosch. Lascede düt bel nët y tolesse para osc refodam. Orun organisé n evënt limitan y eliminan le refodam; un investí te mesi alternativs, mo pur ester bogn da arjunje chësc resultat unse debojëgn de osta colaboraziun! I se confortun da partí chësta beliscima esperiënza cun düc os! GIULAN

L inauguraziun dl festival sarà in jöbia ai 12/9/19 dales 20:00 tl salf dles manifestaziun dla Ciasa J.B. Rinna a San Ciascian.

Al gnarà prejenté l program dl festival, la filosofia dl proiet y metaran a ji le prüm workshop dl Esperiënza Balance, sön la tematica dl IMPAT, in colaboraziun cun le referënt Christian Trebo dla fondaziun Be the change - Sides le cambiamënt.

Le 13-14-15 de setëmber saran spo alaleria, al Sas Dlacia, a San Ciascian (Sciaré).

Periun da lascié l auto tla plaza dai auti dl festival, dlungia la Capanna Aplina y gni spo adarlerch a pé, pasan ia le rü jan sura le pice punt y spaziran dô la sëmena che porta te bosch, al festival. Un prenoté bel tëmp, sorëdl y bun cialt. Mo sce ala ess da sceché dassën, gnarà i workshop y i seminars tignis tla Ciasa J.B. Rinna a San Ciascian. Cambiamënc y comunicaziuns gnarà publicades online sön la plata web www.altabadiabalance.com y sön nosta plata Facebook Alta Badia Balance. I se aspetun cun ligrëza!

valutaziun
Submitting your vote...
stampè