Home
Noeles

Notizies dal Aiut Alpin Dolomites

L'ena passeda ne n'iel per fertuna suzedù deguna gran desgrazia ti crëps, mé un n iede iel stat da ti purté aiut a alpinisć y plu avisa sun Stevia. N jëunn de 27 ani de Gherdëina, che jiva danora, ie tumà tla corda se fajan n tai sot dl ciauciani. Cun na binda de 81 metri à i judacrëp dl Aiut Alpin tëut ora dl crëp l ferì y si cumpani y i à menei a Puntives. Chël che se à fat mel ie unì sëurandat a na ambulanza che l à menà te spedel a Persenon y da chësta ambulanza à l Aiut Alpin ntant ciarià tl joler n ël cun problems al cuer, che messova ruvé de prëscia a Bulsan te spedel.

Sun troies y sciortes, ulache l ie mo for n gran muvimënt de jënt, iel plu iedesc stat de bujën dl joler. Nsci iel ruvà ite na cherdeda dala zentrela de Bulsan che tla provinzia de Belun adurvovi n joler per n ntervënt sun l Passo della Sentinella sëura la utia Berti. Iló fòvel na grupa de cin' persones de Roma che jiva juvier y un de chisc ie sbriscià sëura troi ju per n 20 metri y se à sburià su dassënn l mus, ma per fertuna ne se àl fat nia deplù. Cun la binda iel uni trat su tl joler y menà te spedel de Belun. I autri se à rangià y ie jic ju tla utia Berti. Sun Jëuf de Frea ie n'ëila, de 63 ani da naziunalità tudëscia, tumeda sun troi y se à rot na giama. I uemes dla Crëusc Cuecena ova bele ciarià l'ëila sun l madroz vacuum. Cun l joler l'àn pona meneda te spedel.

N auter iede àn messù julé sun sciorta da Mesdì per n'ëila de 56 ani, che ne ruvova nia plu inant. La fova jita ora de troi suinsom dla furcela y ne se nfidova no plu a jì suvier y no juvier. La seniëura tudëscia àn trat su tl joler tres hovering y la à meneda ju a Urtijëi.

La zentrela dl 112 à pona mandà l joler dl Aiut Alpin sëura la sënta de Puntives su, ti bòsc de S. Piere, per n'ëila nglëija de 35 ani che se à perdù. N ie stac boni de s'la udëi ora sot a ch'i cherzuei de Resciesa y cun la binda la àn trata su te joler y davia che l ne ti manciòva zënza nët nia à pudù la lascé ju a Puntives.

N juebia dl'ena passeda iel suzedù na desgrazia sun stradon sëura Colfosch. N tudësch de 64 ani ie frit cun si motor te n auto y se à rot tramedoi cnodles y à batù dassënn l cë. Riesc iel unì menà cun l joler te spedel a Persenon. Sun l post a judé pea fòvel nce la Crëusc Blancia y i Carabinieri de Corvara. Puech do la desgrazia cun l motor àn messù julé a Soraga via n Fascia, iló fova na turista tudëscia de 46 ani tumeda burt cun la roda. La se à rot i osc dla cnodla y se à nce fat mel al spinel. Sun l post fòvel bele i Judacrëp de Zënter Fascia che à nce cherdà l joler.

L Aiut Alpin ie pona nce unì cherdà per na desgrazia sun la streda dla Mëndula, inò danter n motor y n auto. Do avëi stabilisà chël dal motor, n ël jëunn de 33 ani dl Trentin, l àn menà tl spedel de Maran cun n politrauma.

A Ciastel, plu avisa tl raion artejanel Telfen, ie n camionista tumà ju dla cassa de si camion de fajan mel al spinel, al uf y a na sciabla. Deberieda cun i uemes dla Crëusc Blancia iel unì ciarià tl joler y traspurtà tl spedel de Bulsan.

Coche for iel nce stat da fé ntervënc per emergënzes saniteres, per de tei che ie unic stlec, ova problems al cuer, doi iedesc nce per persones che ie unides pices dala bespies, per na pitla muta che a batù dassënn l cë ntan che la fajova damant o nce a S. Cristina per n'ëila de 30 ani che ie tumeda ju dla sbinga te n parch dai juesc y se à fat mel al fil dl spinel.

Julei iesen nce sa la utia Grohmann te Ridnaun, per l ost de chëla utia che ova tan mel al spinel che l ne fova nia plu bon de se muever. L dutor dl Aiut Alpin ti à fat na spriza y pona ti iela riesc jita miec.

Vel' iede iel nce stat da fé n trasport da n spedel al auter, coche per na landa che se à trat ora de luegia l uf y à messù unì meneda dal spedel de Burnech te chël de Bulsan.

 

 

valutaziun
Submitting your vote...
stampè