Home
Noeles

Soundwave Project - n proiet che á afasciné y incuriosé n gröm de ascutadús

En sabeda ai 31 de agost y en domënia ai 1 de setëmber á n valgügn ciantarins y musizisć dla valada tigní n conzert unich tla Ciasa dla Cultura a La Ila.

 

Incër les 20.15 ê le salamënt implí da n gran numer de amanc y apascioná dla musiga. Intartant che la jënt se sentâ jö y aspetâ coriusc le scomenciamët dl conzert ê i ciantarins/les ciantarines y i musicontri do paladina n pü’ grams, mo ince cuntënc y braui da podëi finalmënter, do tröpes proes, porté dant a n publich tan numerus i früc de so laur.

L’idea de chësc proiet inovatif por nosta valada é bele piada ia dan da presciapüch n ann, a ce dl proiet dui jogn de Badia, Guz Mangutsch y Peter Verginer. I dui compagns, liá dala pasciun por la musiga, orô porvé da porté sön paladina n proiet musical che se desfarenziâ dai conzerc che ascutun “de regola” tla Val Badia. Ispiré ai porchël le Soundwave Project a de gran conzerc live.

Por realisé y concretisé l’idea jora naturalmënter debojëgn de porsones motivades y competëntes. I iniziadús dl proiet s’á insciö metü en aziun, daman y chirin ciantarins y musizisć de döta la valada. Dô deplü mëisc á l’idea bel plan ciafé forma y le grup dl Soundwave Project ê formé. Sëgn podô le proiet se concretisé.

Tratan i mëisc de jená y forá á i ciantarins y les ciantarines metü man cun les proes n iade o deplü al’edema. Te chësta fasa iniziala, á i componënc dl proiet albü la poscibilité da sperimenté süa usc. Bele dal scomenciamënt inca é i ciantarins y les ciantarines stá mëmbri atifs dl proiet, mostran sües preferënzes y süa personalité tla dezijiun dles cianties da porté dant al publich. Nia pro vigni ciantia n’â le grup les notes a desposiziun. Por chësta rajun messâ i ciantarins adöm ai musizisć mët en pratica n bun laur de grup.

Les proes s’á deslarié fora por n tëmp valgamia lunch, tëmp olache vignun á dé corp y anima, perfezionan la usc y fajan ince val’sacrifize. Danter i mëmbri dl grup, liá dala pasciun por la musiga, s’al instauré n bel raport de respet y amizizia.

La fasa prinzipala jô bel plan a piz y i conzerc preodüs por i mëisc de agost/setëmber gnô tres plü daimpró.

 

Incër les 20.30 á le Soundwave Project fat so ingres te n salf implí de jënt, curiosa de ci che al ti éss aspeté. Le fin de Gustav y Peter ê chël da ti fá ciarcé al publich la gran musiga mondiala, porchël ai presenté ala jënt na ligna de bëgn 18 cianties che jô dal pop al rock. Mancé ne podô nia i titui di Pink Floyd, Coldplay, Dire Straits, de Phil Collins, Joe Cocker, Bryan Adams, Michael Jackson, Eros Ramazzotti, Family of the year, Kansas y n gröm d’atri artisć.

 

Dô la daurida dl conzert cun n bel duet minâ le publich da avëi capí n pü’ ci che al ti aspetâ fora por la sëra, mo tratan le conzert á le grup tres indô salpü da fá resté le publich zënza parores.

Al é gnü trat ite cun düc i sënsc, balán, batôn les mans y s’á insciö lascé entusiasmé y condüje dala bela musiga.

 

En ocajiun de na te’ sort de conzert sogâ sambëgn ince la moderaziun dla sëra n rode important. Guz y Peter á orü ispiré le conzert a de gran conzerc live, chël ó dí, tröpa musiga y püces parores, aspet dër garaté. Le presentadú Emanuel Costa á condüt i spetadús te na manira dër plajora y ligherzina, fora por le program.

Al Soundwave Project á tut pert indöt 8 solisć y solistes (Anna, Elisa, Julia, Vanessa, Elvis, Gabriel, Matthias y Julian), 10 musizisć partís sö te na band metüda adöm da Guz, Peter, Martin, Luca, Benno y Gödi y da na brass- band cun Robert, Matthias y André. Fora de chisc musizisć án podü saludé sön paladina n “special guest”, le jonn chitarist Michele de 12 agn che á desmostré al publich so gran savëi y sües bones capazités.

A dötes chëstes porsones ti sporjun n gran complimënt y naturalmënter ince n gran giulan.

L’organisaziun dl Soundwave Project tol l’ocajiun da rengrazié Andrea Tasser che á sostigní i ciantarins y les ciantarines tratan döt le percurs y sambëgn Benni, le tecnich audio y löms. Zënza to aiüt y tü consëis Benni, ne foss la realisaziun dl proiet nia garatada insciö.

Por vire tres indô les emoziuns de chësc bel proiet rengraziunse Marco, Teppo y Werner che á realisé n bel film.

Last but not least ti sporjun n gran giulan a nüsc sponsors (Sorvisc ai jogn, Assoziaziun turistica Alta Badia, Cassa Raiffeisen, Auto Alta Badia, SEVE Studio Verginer y Gaidra) che cun so aiüt finanziar s’á dé la poscibilité da jí sön paladina por trasmëte nosta gran pasciun por la musiga.  (Por le Soundwave Project Stefanie Burchia)

valutaziun
Submitting your vote...
stampè