Home
Noeles

Orghe nü tla dlijia da La Ila

Bele dal 2012 incá éle gnü rajoné de problems con l’orghe vedl, y che al foss sté da fà valch por mioré la situaziun. Al fô ince pücia lerch por l’cor che ê intratan bindebó corsciü.
Siur Curat Christian Moroder ti dê na gran importanza al cianté y soné te dlijia, y propi con só sostëgn él gnü tut la dizijiun de lascé fà n orghe nü. Al é spo gnü metü sö n comité che à mené inant dötes les pratiches. Al é gnü enciarié la famiglia de Giovanni Pradella dla Valtellina a costruí l‘ nü orghe tla dilijia da La Ila.
N domënia ai 6 otober 2019 á Siur Degan Iaco Willeit, adüm con Pater Urban Stillhard y Siur Curat Iaco Willeit, benedí l’orghe nü. Por abelí la festa á l’cor de dlijia, con so dirighënt Konrad Tavella cianté, adüm con na bona orchëstra, la „Krönungsmesse“ de A. Mozart. Por l’pröm iade unse dailó podü aldí l’bel gran sonn dl orghe nü, soné dal organist Franz Comploi. Pater Urban á te süa pordica alzé fora  
l‘ valur dl orghe por la comunité: al é l’simbol dla löm de ligrëza te n monn gunot n pü‘ scür.
Tröpes istituziuns y porsones privates à daidé finanzié l’orghe nü. Ince la Cassa Raiffeisen Val Badia á dé n bel  sostëgn finanziar por chësta opera importanta dla comunité, dër bel giulan!

A inom dl Cor de Dlijia da La Ila
Rosmarie Castlunger

La Ila, ai 9 de otober 2019

valutaziun
Submitting your vote...
stampè