Home
Noeles

Notizies dal Aiut Alpin Dolomites

Nce chëst'ena passeda iel unì fat de plu proes cun l joler dl Aiut Alpin y la scuadres di judacrëp, proes che ie de bujën per istruì duc chëi che muessa purté aiut tla montes y dantaldut ti crëps y che butà per purvé ora tecniches nueves y se baraté ora esperienzes. N à fat de plu proes a Vilpian cun i judacrëp dl BRD y una cun l CNSAS tl raion dl Jëuf de Frea - Gerhard, ulache l ie unit adalerch judacrëp de dut Südtirol.

 

Danterite y danterora univa l joler dl Aiut Alpin nce mo cherdà un o doi iedesc al di per ntervënc, la gran pert saniteres, ma nce per vel' desgrazia.

Nsci iel stat da julé a Villanders, ulache n paur che fova tl lëur de taië lëns ie ruvà sot a n lën ite y ie sbriscià cun lën y dut n chindesc metri ju per n rone. L se à fat mel dassënn al piet y se stentova a tré l fla. Do che l dutor l à vijità y ti à fat na spriza contra l mel, l àn metù tl sach vacuum y ciarià tl joler per l mené a Bulsan te spedel.

N auter di iesen unic cherdei per na desgrazia sun streda te Sarntal, ulache doi auti ie fric adum plutosc dassënn. L'ëila che avisova un di doi auti, na landa tudëscia de 71 ani, se à fat scialdi mel, a na maniera che la à messù unì ntubeda per l trasport te spedel a Bulsan. I autri se à per fertuna fat puech y nia.

Pra vel' ntervënt iel nce bele unit scur y n à messù se nuzé di njins y udleies da julé de nuet per l jol de ëuta a Puntives.

 

L Aiut Alpin uel te chësta ucajion rengrazië de cuer duc i zitadins che n marcià de Segra Sacun ie unic a sustenì chësta urganisazion cumpran o renuvan la cherta de sustëni per l ann 2020. Da pert de duc i cumëmbri dl Aiut Alpin vëniel sentì gra per l gran sustëni sibe moral che finanziel.

valutaziun
Submitting your vote...
stampè