Home
Noeles

Notizies dal Aiut Alpin Dolomites

Chëst'ena passeda iesen mo unic cherdei per n valgun ntervënc saniteres, danter chisc bën doi iedesc per pitli popesc che n à pona menà te spedel. A Lengmoos iesen jic n aiut de n ël che ie tumà cun la roda, ma à tl prim minà de vester bon de se curé nstës davia che l ie dutor. Ma ngali se n stajòvel tan mel che l à mpomo cherdà aiut. Davia che l se stentova dassënn a tré l fla se à i uemes dla Crëusc Blancia damandà l ntervënt dl dutor y do na vijita l àn nsci menà te spedel cun l joler.

Per n'ël de 53 ani che n à giatà destrat sun fonz te si cësa a Weißenbach ne n'iel plu stat nia da n fé. Dal'autopsia che unirà fata puderàn nrescì ciuldì che l ie mort.

Da fé fòvel nce mo na proa cun i judacrëp de Fascia y dl Primiero, scuadres che fej pert dl Aiut Alpin Dolomites. Chësta ie stata l'ultima de na lingia de proes fates d'autonn, dan mené l joler a fé si manutenzion.

 

Ai 27 de utober l ultimo di

N dumënia iel stat l ultimo di che l Aiut Alpin Dolomites ie julà per chësc instà 2019. L ie l prim iede che la Provinzia à dat pro al Aiut Alpin de finé via la sajon permò ala fin de utober, ti ultimi ani àn for messù lascé cun l servisc ala fin dla peima ena de utober. Chësc ie n pitl, ma de velch gran var per la valedes ladines y ntëurvia, ajache nsci àn for n dutor da garat sce l ie vel' desgrazia o cajo de bujën.

53 ntervënc àn mo fat ntan l mëns de utober. Per l Aiut Alpin iel nce n cër custimënt a tò per n mëns deplù n dutor, n pilot y tenì mpe na scuadra ntiera, ma cun 50 ntervënc iesen boni de se paië duta la spëises, davia che n giapa dala Provinzia 62,42 € per uni menut fat per n sucors. Ntan dut l instà àn fat 538 ntervënc, te dut l ann 1082.

 

L Aiut Alpin Dolomites uel nce auzé ora la bona cunlaurazion cun l'Azienda Sanitera provinziela, cun la zentrela per cherdedes de prim aiut 112 y l Heli Südtirol.

Ti sentì gra uelen nce a duc i ulenteres dla grupes di judacrëp, ai piloc y anestesisć, uemes pra la binda y tecnicheri dl joler, che à fat servisc uni di tla sënta dl Aiut Alpin a Puntives. N rengraziamënt de cuer ti va a duc chëi che juda cun man o cun n sustëni finanziel acioche L Aiut Alpin possé fé si atività y salvé inant persones te deficultà.

Per la sajon da d'inviern meteràn man cun l servisc ai 5 de dezëmber 2019.

 

Statistica di ntervënc dl instà 2019

L Aiut Alpin Dolomites à fat servisc chësc instà dai 8 de juni nchin ai 27 de utober. Te chësc tëmp àn fat 538 ntervënc cun l joler, la gran pert fova per de tei che jiva a crëp o da mont su (160 caji). Pra i autri ntervënc se tratòvela de desgrazies suzedudes sun streda, pra l lëur o pra ativiteies de tëmp liede, per emergënzes de sanità y nce per jì a crì persones.

- Aldò dla provinzies ie i ntervënc partii su nsci: Bulsan 498, Trënt 16, Belun 24.

- Persones salvedes:

563, de chëstes 278 per emergënzes saniteres, 189 che se à fat mel, 63 che ne se à fat nia; 33 morc (de chisc 23 per problems de sanità y 10 te desgrazies d'uni sort).

- Da ulà univa pa la persones salvedes:

371 dala Talia (de chisc 244 dal Südtirol, 6 dal Trentin y 5 dala provinzia de Belun);

135 dai Paejes Tudësc y dal'Austria

57 da d'autri paejes dl'Europa o da delà dal'ega.

- 16 ntervënc àn fat o finà via de scur.

valutaziun
Submitting your vote...
stampè