Home
Noeles

Notizies dal Aiut Alpin Dolomites

N valguna cosses drët particuleres pudons usservé danter l'atività dl Aiut Alpin ntan chëst'ena passeda: n lunesc ai 27 de jené àn fat l 250ejim ntervënt de chësta sajon, n juebia ai 30 dl mëns iel stat l prim di cun degun ntervënt, n sada ai 1. de fauré n àn fat nchinamei ot, che ie inò scialdi. Manco bel iel a repurté che n à abù trëi caji de mort te chësta ena, doi propi ndolauter. Chësc ie suzedù n lunesc, ulache n ël ie unit stlet pernache l ie ruvà su sun Plan de Corones y nce sce i uemes dl servisc sun purtoi y dopro nce l dutor dl Aiut Alpin à purvà a l reanimé cun duc i njins, ne n'iel stat nia da n fé. Riesc lessù iesen julei a Tisens dlongia Ciastel, ulache a na landa de 87 ani che tizova te furnel se àl mpià su si guant. Purtruep ie uni aiut ruvà massa tert y l ie burt a l dì, ma chësta puera landa ie varduda ju y n possa mé se nmaginé ce mel che la arà abù nchin a si fin. L terzo cajo de mort de chësta ena, ulache n à dant mo purvà giut cun la reanimazion, ie stat te Sëlva per n ël da iló de 69 ani.

N di ulache n se à fat ert a fé i ntervënc ie stat n merdi y chël pervia dl nibl. Cun i uemes dl servisc sun purtoi àn perchël fat ora de mené i desfertunei te na luegia ulache l fova mesun i ciarië tl joler.

Danter i ot ntervënc fac n sada, n fòvel trëi per gaujes saniteres, un de chisc de scur. De scur iesen nce unic cherdei per una dai schi che ie tumeda tl raion de Meransen, ma n ne savova nia ulà avisa. Ntan che n ie julei a tò n judacrëp ie l ntervënt unì desdit pervia che n la à giateda ntant y la ne ti jiva nia tan stleta. N chësc di ie nce doi mutons de 8 y 12 ani fric adum sun i purtoies de Sarntal. La muta se à rot l os dla cuessa y l mut ova n trauma al cë, al mus y al torax. Puech do iesen julei sun l Rosskopf, ulache n mut de 14 ani ie frit te n lën y se à rot l os dla cuessa.

De plu ntervënc per caji grieves iel nce stat n dumënia. Bën trëi à batù dassënn l cë, nsci n ël a S. Cristina che ie sbriscià sun la dlacia y ie unit da nescia, sun Dantercëpies ie n ël de 62 ani da tlo tumà a furné danter i pei da slalom y pona mo sun la Plose n ël de 68 ani. A dui trëi ti à l dutor cun na odla furà te na vëina y dopro i àn debota menei te spedel. Mel dassënn se à nce fat n tudësch de 46 ani sun la Pela de Col Raiser. L se à rot tramedoi giames y briova dal mel. Na jëuna de 17 ani ie tumeda sun Renon cun l snowboard y se à fat mel al spinel y al uf.

Per doi schialpinisć tudësc che fova sun Mëisules à la zentrela de Bulsan cherdà l Aiut Alpin, ajache chisc ne se abinova nia la drëta streda da unì ju y ova nsci dat ëuta, aspitan pra la utia de Pisciadù che l joler unissa a i tò.

valutaziun
Submitting your vote...
stampè