Home
Noeles

Notizies dl Aiut Alpin Dolomites

Chëst'ena passeda ie l Aiut Alpin Dolomites ruvà a si 400ejim ntervënt de chësc inviern!

Son tl tëmp de sajon auta y aldò iel nce da fé. N juebia y vënderdi dl'ena passeda ai 20 y 21 de fauré àn fat un n di nuef y l di do bën diesc ntervënc.

 

Desgrazies sun streda

Ntan chëla ena ie l Aiut Alpin nce unì cherdà trëi iedesc per na desgrazia sun streda. N merdi puech dan mesdì per n auto che ie frit ora de streda sun l stradon de Puster y se à drusà. N aiut iel nce unit la Crëusc Blancia y i destudafuech. N à messù reanimé l ël de 54 ani che avisova l auto y canche n à menà l pazient politraumatisà tl spedel cun l joler, batova si cuer inò da sëul.

Doi dis do ie l Aiut Alpin unì cherdà per na landa de 84 ani, che ie unida meneda sot a Corvara. Do la prima cures dl dutor la àn meneda te spedel a Burnech.

Doi jëuni de 22 ani se à fat scialdi mel pra na desgrazia sun streda via n Fedom. Tramedoi se ova giapà n drë colp tl vënter a frì adum cun l auto, la jëuna nce al spinel. N jagova che i pudëssa nce avëi ferides dedite. Riesc i àn perchël menei tl spedel de Belun.

 

Nia mé ntervënc sun purtoi

Nia belau mé ntervënc sun purtoi, coche l ie stat l'ena dant, ne n'àn abù da fé l'ena passeda. Propi n valgun iedesc iesen nce unic cherdei per pitli mutons che giapova granfs dala gran fiëura o se n stajova scialdi mel.

 

Nce pra i ntervënc sun i purtoies tòmel tl uedl chëst iede, che l ie stat truep mutons che se à fat mel. N lunesc àn fat trëi di cater ntervënc propi per mutons de na età mpue sëura i diesc ani. N mut de 14 ani ie tumà a Meransen y se à fat scialdi mel al spinel. L dutor dl Aiut Alpin stajova nce scialdi ert, ajache l mut – l fova n tudësch – ne muova nia plu la giames. N à cialà de l ciarië bel fin tl vacuum y l mené riesc te spedel. L medemo di ie sun l Rosskopf n mut frit sëura purtoi ora y cun n politrauma l àn menà deberieda cun si oma te spedel. Puech do fòvel da jì n aiut de n mut sun l purtoi de Sas dla Crëusc a Badia. Chësc mut àn giatà pundù tla nëif. Do che n à capì cie che l fova suzedù, l àn ciarià l vacuum y menà te spedel.

 

Sun i purtoies dai schi iel nce suzedù n valguna desgrazies mpue plu grieves. Sun n purtoi sëura Piz Setëur ie n ël tudësch de 52 ani tumà y se à trat ora de luegia tramedoi braces. L ova sambën n gran mel! Sun Speikboden iesen unic cherdei per n'ëila de Praga, che se à rot burt n brac a na maniera che l os cucova ora. Sëuraprò se òvela bonamënter nce mo rot n valguna rëpes.

A de tei che fier adum a jì cun i schi iel ënghe for inò da jì a judé, ma burt ti àla tucà a n snowboarder sun Plan de Corones, che a frì adum se à rot na giama tant burt che l os cucova ora. Riesc l àn nsci menà tl spedel.

 

Ntervënc per schialpinisć che se à fat mel furnan ju cun i schi, àn fat sun Sasplat y tl raion dla Trëi Pizes de Lavarëi. Tan mel ne se ài nia fat, ma l ie mpo da fé l ntervënt cun l joler, ajache l ie scenó rie ruvé permez y l durëssa dantaldut giut nchin che i ruvëssa pra n dutor.

 

Danter plu ntervënc per problems saniteres y nce vel' trasferimënt iel nce stat da ti purté aiut a lauranc. Te Pfunders tl bosch se à n laurant de 41 ani fat mel cun la binda de si tractor. Abinà dala corda se àl fat mel dantaldut a na giama. Te chëla luegia iel stat mesun lascé ora l dutor y l judacrëp n hovering y a cun chësc sistem iesen nce stac boni de ciarië l desfertunà do l avëi metù tl vacuum. Ënghe inò tl bosch àn messù jì n aiut de n ël de 45 ani che laurova de leniam. L se à giapà n tram ados y se à fat mel a na giama. Chësc ie suzedù daujin a Jenesien.

 

Śën che i dis vën for plu lonc iel nce plu dinrer da fé ntervënc de scur. Ma un n iede iel mpo stat da muever y plu avisa sun l purtoi iluminà de Obereggen, ulache na muta dal snowboard ie tumeda se fajan scialdi mel ala sciables y ne fova nia plu bona de se spusté da chëla luegia. Cun l joler la àn riesc meneda te spedel a Bulsan

valutaziun
Submitting your vote...
stampè