Home
Noeles

Notizies dal Aiut Alpin Dolomites

L Aiut Alpin jola inò

Servisc slungià chëst ann d'instà nchin da Unissant y slargià ora, a rotazion, nce nchin tert da sëira. Ntervënc dl Aiut Alpin ënghe tl respet dla normes contra l Covid-19

 

Cun n sada ai 6 de juni à l Aiut Alpin inò metù man cun si servisc per la sajon da d'instà.

Sce n fova ti ani passei a despusizion per julé n aiut nchin al scumenciamënt de utober, dan Segra Sacun, slungeràn chëst ann l servisc nchin da Unissant. N à udù che ntan l mëns de utober iel suvënz mo truepa jënt che va da mont su y n à nsci for inò de bujën dl Aiut Alpin per vel' ntervënt.

 

A despusizion 12 ëura al di, uni terza ena nce nchin la 11 de nuet

 

L joler cun na scuadra dl Aiut Alpin ie a despusizion 12 ëura al di. Coche for scumëncen cun l servisc dala 8 daduman y fej inant nchin la 8 da sëira. La scuadra che ie de servisc ie daniëura metuda adum dal pilot, n dutor, n sucoridëur ala binda y n judacrëp. Ajache n ie nce njeniei ite drët bën per julé de nuet, àn fat ora deberieda cun la "Landesflugrettung", l servisc provinziel de aiut cun l joler, de se baraté ju cun l Pelikan 1 y l Pelikan 2, per fé servisc uni terza ena nchin la 11 de nuet.

Te chëi dis adurverà l Aiut Alpin na segonda scuadra, che fej servisc ntan chësta ultima cater ëura, davia che na scuadra de prim aiut ne possa nia fé plu de dodesc ëura de servisc ndolauter.

 

Normes de segurëza Covid-19

 

Coche bele ti ultimi mënsc de chësc inviern, ne n'iel nce śën d'instà nia udù dant l trasport cun l joler de pazienc amalei de coronavirus. Sce n jega che zachei ie nfetei cun chësc virus, vëniel for cherdà na ambulanza che ie njenieda ite aldò. Ma sce l ie n tel ntervënt ti crëps y sce l ie n politraumatisà pona muessen avëi dut: mascra, udleies, manëces, tuta, per l dutor la mascra FP3 propi coche tla Sanità, spiega l sëurastat dl Aiut Alpin Adam Holzknecht.

 

Na lingia de proes

 

L'atività dl Aiut Alpin Dolomites à metù man cun na lingia de proes, cun grupes de judacrëp di raions desferënc y nce per nfurmé coche l ie da se cumpurté n cont dla normes pervia dl coronavirus.

N sada daduman abenëura àn scumencià cun na grupa de n trënta judacrëp de Gherdëina che ie unic menei tla grupa dla Odles, ulache i ie unic lascei ju tres hovering o cun la binda te plu lueges per purvé ora pona iló manieres desferëntes de ntervënt.

Dopro iesen julei tl raion de Le Sest sa la utia dla Trëi Pizes de Lavarei per n ajurnamënt y na proa cun passa vint judacrëp da iló, che ie unic julei su cun la corda fissa o lascei ora tres hovering sun l Toblinger Knoten, da ulache i se lasciova ju per vies desferëntes.

La terza proa fova pona a Vilpian cun i judacrëp dl BRD, ulache n se à baratà ju cun l Pelikan 1 y à mo purvà ora tecniches d'uni sort cun la binda, l sach da taché tla binda y cun la corda fissa tacheda sot al joler.

Ntervënc ne n'iel n chësc di mo stac deguni, bonamënter nce ajache n fova mpeniei cun la proes, che n ne n'à perauter nia pudù fé coche zënza propi pervia dla normes de segurëza dl coronavirus.

 

Ntervënc saniteres

 

L prim ntervënt dla sajon per l Aiut Alpin ie pona stat n dumënia ai 7 de juni a Tirsc, ulache na persona de 74 ani ie tumeda ntëur te cësa. L fova bele ruvà leprò l prim aiut che à scumencià cun la reanimazion. Pernanche l ie ruvà dutor àl messù ntubé l pazient y ti sprizé la drëta medejina, nsci àn pudù l mené tl spedel a Bulsan.

N lunesc iesen unic cherdei doi iedesc. N iede a Prettau per na lande de 64 a chëla che l ti à striscià l bot y che n à, do la cures dl dutor, menà te spedel de Burnech. Ntëur mesdì pona per na landa de 70 de Fie che se n sajova mel, ma do la vijita dl dutor che ti à mo dat vel' medejina, àla pudù se n sté a cësa y nsci a l joler pudù se n julé de reviers te si sënta a Pontives.

valutaziun
Submitting your vote...
stampè