Home
Noeles

Notizies dal Aiut Alpin Dolomites

Vintset ntervënc àn fat ntan l'ena dai 6 nchin ai 12 de lugio. Plu iedesc iesen unic cherdei per de tei che ti à striscià l bot, sibe ti luesc che da mont su.

Sun i troies sa mont y da na pert ora àn ënghe fat plu ntervënc y cun l aiut dla binda bùtela dassënn a ruvé permez tla lueges plu ncompres. N lascia ju dutor y judacrëp pra i desfertunei y possa pona i tré su per i mené aslune te spedel o al segur, garantian nsci n ntervënt scialdi efizient y asvelt. Nsci iel stat sun Stevia, per na landa che se à fat tan mel a n jenodl che la ne fova nia plu bona de jì inant. Pona tl raion dla Trëi Pizes de Lavarei sun l troi che va sot ala piza Frida via, ulache na landa tudëscia de 54 ani ie tumeda sëura troi ju. N auter di che n ie julei via la "Drei Zinnen" fòvel da jì a tò n'ëila de 44 ani che fova tan stancia y fineda che la ne fova nia plu bona de jì inant. Do chël iesen unic cherdei dala zentrela de Pieve tl Ciadura per julé sun l troi che dal lech de Misurina va de viers dla grupa Cadini, ulache na landa se à fat mel a n jenodl. I Judacrëp de Gherdëina, che fova sun l Troi dla Posta sëura Puntives su cun n'ëila de 40 ani che se n stajova mel, ova de bujën dl dutor. Chësc ntervënt àn fat a pe y pona cun la binda per mené la landa te spedel. Tl bòsch a Jenesien iesen jic a tò, deberieda cun i judacrëp de Bulsan, na landa de 63 ani da iló che ie sbrisceda y culeteda ju n diesc metri. Sun l Viel del Pan ie doi seniëures sbriscei ju n tòch y fova po tan sprigulei che n à messù jì a i tò cun l joler.

Aldò che i judacrëp de Ahrntal savova da dì, ne n'iel mei stat che i à messù fé trëi ntervënc te n di. Chësc ie stat n mierculdi ai 8 de lugio. N iede iesen jic n aiut de n ël da iló, che ie sbriscià sun n troi y se ova bonamënter rot na sciabla. Riesc do iesen julei sëura Prettau su, ulache n'ëila ie unida stleta. La scuadra njenieda ca per suspet de Covid àn lascià ju pra la landa che ie pona unida trata su tl joler per la mené pra na ambulanza che à fat l trasport nchin te spedel. Julei de reviers a Puntives àn n iede messù dejenfeté joler, njins y dut per vester pona inò njeniei a pië via do la set da sëira inò te Ahrntal, ulache n ël de Weißenbach se à fat mel a na giama y à messù unì menà te spedel.

 

N cont de ntervënc ti crëps, fòvel da julé sun Sas Rigais, ulache na jëuna de 22 ani ie tumeda y se à fat mel a n jenodl. La ne fova nia plu bona de jì inant, perchël se àn damandà l ntervënt dl joler, che la à pona trata su cun la binda y meneda te spedel.

N dumënia domesdì cherdova i judacrëp dl'Alta Badia, che sun Sas dla Crusc fòvel doi jëuni sun la via "Perla Orientale", na via de 8. grado, y un fova tumà tla corda per bën 25 metri se fajan mel a na ciavidal. L tacova tla corda tenida da si cumpani! Do che i uemes dl Aiut Alpin se à cunscidrà ju la situazion, se ài mpensà de tò ora de parëi i doi jëuni cun la binda. L fova n ntervënt drët tecnich, ulache l judacrëp tacà tla bina ie unì sbingà nchin pra l alpinist tumà ju, l à tacà ite pra d'ël y à taià via la corda. Nsci àn pudù l tré su tl joler y l à menà japé de parëi, ulache l dutor aspitova bele per l vijité. L cumpani de cordata àn tëut ju ala medema maniera y ala fin àn menà chël dala ciavidla rota te spedel.

 

Per de tei dala roda iesen julei n iede sëura Villanders, ulache un dala roda ti ie frit doite a na landa de 70 ani y la à batuda ntëur.

N auter iede iesen unic cherdei tla Val Badia do l tunel de "pont de fer", ulache un dala roda fova tumà y se ova sburià su dut ntëur. Te chël mumënt passova ilò Max, l ost de Fanes, che se à riesc ntendù che chësc berba ne n'ova nia la drëta. L à debota cherdà na ambulanza y l joler cun l dutor. Sambën che l se ova nce giapà n drë pëch al cë. Ciarià tl madroz vacuum l àn pona menà te spedel.

A St. Johann te Ahrntal ie n'ëila de 50 tumeda cun la roda y canche l joler ie ruvà leprò, fòvela for mo da nescia. L dutor à messù ntubé l'ëila che ova n politrauma dan la mené te spedel. Y l ultimo dala roda fova tumà a furné juvier per n troi stënt y ërt ju per n bosch. L ie stat rie da abiné, ajache l ne fova nia iló, ulache l dassova vester aldò dla coordinates giapedes. Canche n l à giatà, àn lascià ju, cun na binda de 37 metri, dutor y judacrëp y l à po' trat su tl joler per l mené te spedel cun la giama rota.

Un n ntervënt iel nce stat da fé per un dal motor a Tiers y un nce tert da sëira, da mesa la undesc de nuet te Ridnaun per n jëunn de 25 ani che ie jit a berdoles per n 50 metri a unì da mont ju y se à fat scialdi mel.

N sada, di de burt tëmp, àn fat un n ntervënt sëul, per n ël cun suspet de Ictus che ie unì menà tla zentrela dl Aiut Alpin dal'ambulanza. Do che la duturëssa ti à dat la prima cures, l àn menà te spedel cun l joler.

Un n iede ntan l'ena iesen nce muec per debant, per na persona che ie unida stleta tl raion dla Trëi Pizes de Lavarei. N ova tëut pea n judacrëp de Toblach che sà nëut, ma n ne à abinà deguni. Bele la cherdeda, mueta dala utia Locatelli, fova mpue fetra y te na pert de chël raion pëia nce melamënter l telefonn. Nsci àla durà mpue giut danter cherdeda y l unì adalerch dl sucors. Bonamënter se à chësta persona ntant refat y se n ie jita inant.

valutaziun
Submitting your vote...
stampè