Home
Noeles

Notizies dal Aiut Alpin Dolomites

13. - 19.07.2020

L'ena passeda ie stata n'ena mpue manco busienta per l Aiut Alpin. Dantaldut ti prim dis dl'ena fòvel da fé un o doi ntervënc al di, sun la fin dl'ena – coche l ie perauter da se aspité – univa pona l not majer cun n cater-cin' ntervënc al di.

 

Truep ntervënc saniteres

La gran pert àn abù da fé ntervënc saniteres, per persones che ova problems al cuer o che l ti à dat l bot. Nsci mé per di n lunesc, ulache l sëul ntervënt dl di ie unì fat permò la mesa la nuef da sëira te Ulten per n'ël de 32 ani che ova na crisa de mel San Valantin. Per persones che se n stajova dassënn mel iesen julei: te Gsies per na landa de 76 ani, a Villanders per n ël de 50 ani, pra la stazion dla furnadoia lassù sun Mont de Sëuc y nce te Sëlva per n patin dla Talia, sun la Plose te na utia privata y a Brembach per na landa plu de tëmp che univa for inò na nescia.

Fertuna à abù n'ëila de 56 ani de Funes, che doi seniëures à giatà sun n luech da paur destrata sun fonz y ne se n savova nia plu. La doi patines, che fova tlamedes iló per saludé chësta landa, à riesc cherdà aiut tres l 112 ajache l ne fova zënza deguni ncantëur. L dutor dl Aiut Alpin la à vijiteda y stabiliseda y pona la àn meneda te spedel.

 

Tumà ntëur sun Setsass

Sun Setsass, puech sot ala piza, ie n ël talian de 75 ani tumà ntëur. L ti ova dat l bot. Si mut che fova pea à purvà a l reanimé nchin che l Aiut Alpin ie ruvà do n diesc menuc cun l dutor. Nce sce n à purvà a l reanimé cun l defibriladëur ne n'iel plu stat nia da n fé. L ël de Castelfranco Veneto ie mort sun l post. Cun l joler l àn menà a Reba, ulache i judacrëp da iló l à pona menà te capela di morc.

Ntan che n fova te chël raion à la zentrela de Pieve cherdà per na pitla muta che ie tumeda sun l troi sot ala Gusella via y se à fat dassënn mel a n jenodl. Deberieda cun si oma la àn meneda tl spedel de Cortina.

 

Tumà te n busc giapà ntan la Prima Gran Viera

Tla montes iel nce stat da fé n ntervënt sun Sas de Stria, ulache n ël de 72 ani ie tumà ju n tòch te n busc che ie unì giavà tl crëp ntan la Prima Gran Viera. L'ël se à fat mel al spinel y perchël àn messù l ciarië bel rëit tl sach da tré su cun la binda per l mené pona te spedel a Burnech.

 

Desgrazies cun la roda

Per de tei che ie tumei cun la roda ie l Aiut Alpin muet doi iedesc chëst'ena passeda. N iede sun Mont de Pana, ulache i judacrëp de Gherdëina ie unic n aiut dl'ëila de Manfredonia, ma ajache i à udù che la l'ova paieda dassënn, ài fat unì l joler. Ëila ova batù l cë y se lamentova de avëi mel de vënter, y n jagova perchël che la ebe splaiedes dedite y nsci la àn meneda riesc te spedel. Nce pra l segondo ntervënt ie ruvei permez n iede i judacrëp, che à pona cherdà l Aiut Alpin. Chësc ie stat per n seniëur che furnova da Plan de Gralba ju cun la roda. A tumé se àl rot vel' os dl mus y ova n trauma al spinel. L fova bele plu de vint menuc pundù sun fonz. L ël ie unì ciarià tl sach, trat su tl joler y menà te spedel. I judacrëp à pona menà i cumpanies y la roda ju te Sëlva.

 

Tumà ju dl lën a jì a broi

A n ël mo drët da ardimënt per si età, ti iela jita mpue da gial a jì a broi. L ël de 79 ani de Gais te Puster ie tumà ju dl lën y se à fat dassënn mel a na giama. Do che l dutor ti à dat la prima cures iel unì ciarià tl joler y menà te spedel.

 

Picei dala bespies

Per chi che à na alergia ai pices dla bespies pòssela unì drët priculëusa. For inò vëniel cherdà l joler cun l dutor nce per de tei caji. A Neva Ladina (Welschnofen) ie n'ëila unida piceda da plu de diesc bespies ntan che la siova n pra. L dutor l'à vijiteda y ti nce dat na medejina sterscia y n l'à pona mo meneda te spedel.

N fova iust ruvei de reviers a Puntives da n ntervënt y ne fova mo nia unic a frida a destudé l joler, che la zentrela dl 112 cherdova bele per n ntervënt a Sëuc. Ilò ie n ël unì picià bonamënter da plu eves. Davia che l se n stajova tan mel, l à la ambulanza sëurandat al Aiut Alpin per ruvé plu aslune a Bulsan te spedel.

Sun n troi sot al Latemar de viers dl lech de Ciarëza ie n'ëila unida stleta. La ova n shock bonamënter pervia de na alergia ai pices de vel' nset. Cun 50 metri de binda iela unida trata su tl joler y meneda tl spedel de Ciavalëis.

 

 

valutaziun
Submitting your vote...
stampè