Home
Noeles

Notizies dl Aiut Alpin Dolomites

De plu ie stac chëst’ ena passeda i ntervënc per de tei che se à fat mel a tumé cun la roda. Nsci ie l Aiut Alpin Dolomites unì cherdà doi iedesc ndolauter sun la Plose, n iede per n’ëila de 53 ani, che tuman se à fat mel dassënn a na sciabla y al fil dl spinel. Puech do pona per n mut de 13 ani che se à rot na giama. Sce l ie per l’ëila stat mesun dé sëura cun l joler iló daujin per la ciarië y la mené te spedel, àn per l mut messù lascé ju l dutor y l judacrëp cun la binda, che l à pona metù tl sach y trat su tl joler. For per un dala roda iesen unic cherdei a Welschnofen, ulache n ost da iló ie tumà burt se fajan mel dassënn. A Kurtatsch ie un dala roda da streda furnà sëura streda ju se rumpian l os dla cuessa y se fajan nce mel mpue dlonch ora y mo n chël di domesdì fòvel da julé sun Mont de Sëuc te Sautaria per na jëuna tudëscia, che a tumé cun la roda à batù dassënn l cë sun l asfalt, restan da nescia.

Per ntervënc ti crëps iel stat da julé sun l Pössnecker a tò ju n ël tudësch de 59 ani, che ruvan tla nëif y tl nibl ne fova nia plu bon de jì inant. Pervia dl nibl a chëla autëza ne n’iel nia stat mesun ruvé permez cun l joler. Nsci àn lascià ora l judacrëp n hovering puech sot al nibl. Chësc ie jit su a pe a tò l ël y l à menà ju tla medema luegia ulache l fova mesun i ciarië sambën inò n hovering. L ël ie unì menà ju n Jëuf de Sela ulache l ova l auto.

La sada, l fova bele domesdì via tert, iesen julei te Pflersch a tò ju dl Tribulaun, a 3000 metri sun la via normal, trëi alpinisć, che ne se giatova nia la via da unì juvier.

Ntervënc da mont su àn mo fat sun l Viel del Pan sëura l lech de Fedaia per n ël de 60 ani che sbriscian sun l troi se à rot na giama, sun Scilier ulache na seniëura de 37 ani se à fat mel y ne fova nia plu bona de unì ju, y nce te Ridnaun puech dan l Pfurnsee, ulache na jëuna da iló ie sbrisceda ju n 100 metri y fova da nescia. Chësta àn menà te spedel cun n politrauma.

La zentrela de Belun à cherdà per n ntervënt sun la piza Terza Media sëura Sappada a 2800 m de autëza, ulache na landa de Zoldo de 57 ani se à nzutà a unì juvier. Cun 10 metri de binda iela unida trata su tl joler y meneda tl spedel a Cortina.

Na burta desgrazia iel suzedù ntan na proa di judacrëp dla verdia de finanza cun i judacrëp de Belun sun la Pizes de Lavarei, cun joleri dla verdia de finanza. Un di uemes - n finanzer de 55 ani y judacrëp de Auronzo - ie unì tucà dala pela dl joler y fova da nescia sun n banch dla piramida dla “Drei Zinnen”. L joler dl Aiut Alpin ie stat bon de desćiarië dutor y judacrëp sun chël banch y do avëi stabilisà l pazient l ài, cun la binda, menà ju ti prei daujin ala utia de Lavarei, ulache l dutor à pona messù l ntubé davia che si situazion tlinica univa for piecia. L à fat dl dut per l tenì n vita, ma do 40 menuc ne n’àl plu pudù fé auter che cunstaté la mort.

valutaziun
Submitting your vote...
stampè