Home
Noeles

Nutizies dal Aiut Alpin Dolomites

De plu ie stac chëst’ena passeda i ntervënc saniteres, ma cun l bel y bon tëmp che l fova, iel nce plu suvënz stat da muever per jì n aiut de alpinisć su per i crëps o sun vies feredes.

 

Muet ie l Aiut Alpin nce n iede per un dal parapënd sun la sciorta dl Dënt tla grupa dl Saslonch. A n jëunn tudësch de 23 ani se ova ntan l jol stlut l parapënd, ma l ie mo stat bon de giaurì chël de resserva y nsci iel stat bon de dé sëura zënza se fé gran mel. L fova mé mpue’ sburià su y ova mpue’ mel a n brac, che l se ova bonamënter rot. Cun la binda l àn trat su tl joler y pona iel unì menà te spedel.

Julan de reviers da Persenon, à l 112 de Bulsan mandà l joler dl Aiut Alpin sun Dantercëpies per n laurant de Sëlva de 50 ani, che se à rot na giama ntan che l laurova pra l purtoi nuef. Do la prima cures dl dutor iel unì trat su tl joler cun 10 metri de binda y pona menà te spedel. N iede fòvel ruvà permez i Judacrëp de Gherdëina, che à po’ fat unì l joler pervia che l ferì ova tan da bestia mel.

A Auer iel suzedù che n ël jëunn de 36 ani se à taià via n dëit. Do che l ie unì medià dal dutor dl Aiut Alpin, l àn menà tl spedel de Dispruch ulache n ie spezialisei per ntervënc de microchirurgia.

 

Dala zentrela de Belun iesen unic cherdei n auter di per n ntervënt tl raion dla Tofanes, ulache doi alpinisć jiva su per la via fereda Lipella y ie ruvei a 3.000 metri tl rie tëmp cun bueles y tampesta. Canche n à udù ulache i fova y che l ne ti manciova nia, àn n iede lascià ju l dutor pra la stazion suinsom dl Lagazuoi y ie pona jic a tò ju i doi che fova moi tres y ova n drë frëit - iló fòvel na temperatura de mé un n degré - y i à menei pra la utia Dibona ulache i ova l auto.

 

L fova bele puech do la set da sëira canche i Judacrëp de Sëuc à cherdà per n ël dla Nghiltiera, che ie jit fauz a unì ju de Sasplat. L fova ruvà te tan na burta luegia che da lajù ne fòvel nia mesun ti jì permez. Cun l aiut dla binda iel unì trat su da chësta luegia ncompra y menà al segur.

 

L Aiut Alpin ie pona unì cherdà dala zentrela de Trënt per na desgrazia sun streda a Pardac, ulache n ël de Trënt de 56 ani ie tumà cun l scooter y ie ruvà sot a n furgon ite. L ie mo unì streflà do sun streda per n 10 metri y nsci se nmaginòven che l se ëssa fat mel dassënn. Canche l dutor ie ruvà leprò, àl cunstatà che l ova mé n brac rot y scenó se òvel mé sburià su mpue’ dut ntëur. L uem de Trënt ie unì menà cun l joler tl spedel Santa Chiara a Trënt.

 

Ntan l jol de reviers cherdova la zentrela dl 112 per mandé l Aiut Alpin sun la Odles a tò ju n alpinist che fova tumà tla corda y se ova fat mel. Ruvei sëura Scilier àn pudù rujené tres funch cun »Rocky« Robert Vinatzer, l cuordinadëur di ntervënc di Judacrëp de Gherdëina, per avëi nfurmazions plu avisa. Ël savova da dì che i fova de doi y che chël che jiva a crëp danora sun la via Dibona dl Sas da Mesdì, fova tumà ju n 10-15 metri y se ova rot na ciavidla.

Canche n i à spiei, àn udù che i fova tramedoi sentei sun n banch sot a n parëi drët ërt y che l fova de bujën de na binda bëndebò longia, avisa de 80 metri. Nscila ie l dutor unì desćiarià sot al parëi te pra per se njenië ca a pië do l pazient che l joler tulova ntant ora de parëi. Do che l dutor ti à cialà al jëunn alpinista de Verona, àl tëut la dezijion de l mené tl spedel, ajache l ova nce n drë mel al piet.

 

A La Val, plu avisa sun Sas de Crosta, fova n ciaciadëur ruvà te na luegia ulache l ne se nfidova nia plu inant, y cun rejon àl cherdà aiut pervia che l ëssa pudù jì a berdoles y se fé n drë’ mel. L jëunn de 25 ani ie unì trat su cun na binda de 10 metri y menà ju pra i judacrëp dl luech che fova ënghe iló.

Dala 1 domesdì iel ruvà na cherdeda dala grupa dl Saslonch sun la via Dimai dl Grohmann, ulache na jëuna de Pfatten fova tumeda tla corda per n 10 metri se sburian su mpue’ dlonch ora. Cun 50 metri de binda iela unida trata su tl joler y meneda te spedel. Sun la sëira fòvel da julé a Le Sest/Sexten sun l Passo della Sentinella per doi jëuni che ne fova nia plu boni de jì inant y de n cër viers cun rejon ài cherdà aiut, ajache i fossa scenó ruvei tl scur y nsci iesi te puec menuc unii menei ju a Le Sest al segur.

 

Da mesa la ot da sëira àn mo messù julé sun l terzo Ciampanil dl Sela per doi jëuni che fova sun piza y ne se nfidova nia plu a unì ju. Ma danz che la piza fova tl nibl y do avëi purvà plu giut a ruvé permez àn messù, pervia dl scur y dl nibl, dé ëuta y mandé su na scuadra di Judacrëp de Gherdëina. Mpue’ dan mesanuet iesi ruvei ju de reviers sun Jëuf de Sela.

 

La ultima doi cherdedes dl’ena passeda ie ruvedes dala zentrela de Trënt. N ie julei a Poza te Fascia, ulache na ambulanza ie unida adalerch cun n pazient fascian de 56 ani cun trauma al vënter, al spinel y al cë, pervia de na desgrazia cun n quod, che se ova drusà. L dutor ie stat bon de l stabilisé per l mené pona riesc te spedel.

Ntëur la set da sëira àn cherdà per doi alpinisć sun la cima Wilma tla grupa dla Pale di San Martino. Da sud unìvel adalerch n gran nibl y perchël ne fova l joler da Trënt su nia bon de ruvé permez.

L Aiut Alpin à pudù unì da nord y nce tlo àn n iede desćiarià l dutor per julé pona su a tò ju cun la binda i doi jëuni de Unieja, che n ulova pona mené pra la utia Pradidali, ulache l fova nce l dutor, ma per gauja dl nibl ne n’ie chësc nia stat mesun y n i à nsci menei ju a Moena. L dutor àn permò pudù jì a tò l di do daduman.

valutaziun
Submitting your vote...
stampè