Home
Noeles

Nutizies dal Aiut Alpin Dolomites

Pervia dla sajon che ie fineda via y dl frëit y dl bur’ tëmp che ie unit docà, ne n’iel ntan l’ena passeda nia stat da fé tan de ntervënc per jënt sa mont, ma plu che auter ntervënc de natura sanitera, de jënt che se n stajova mel.

 

Truep ntervënc saniteres.

Danter chisc iel stat da julé a Pruca pra n’ëila dl luech de sessant’ani. Do che l dutor l’à vijiteda y ti à dat vel’ medejina, ti iela inò jita miec, y nsci iela unida meneda te spedel cun l’ambulanza.

Te Passeier ie l joler dl Aiut Alpin Dolomites unì cherdà per na landa de 67 ani a chëla che l ti ova dat l bot. La ie unida defibrileda n iede dai uemes dla Crëusc Blancia. Da dedò à l cuer inò scumencià a bater y nsci iela riesc unida meneda te spedel tla emodinamica.

N auter ntervënt iel stat te Sëlva pra l dutor Tröbinger, ulache l fova n ël de 64 ani che ova duc i sintoms dl bot al cuer. Do che l dutor dl Aiut Alpin ti à tacà ite l eletrocardiogram, àl tëut la dezijion de l lascé mené te spedel cun l’ambulanza.

A Urtijëi iel stat da jì pra n hotel per n ël de 73 ani de naziunalità nglëijaachëlcheltiàdatlbot. Deberieda cun i uemes dla Crëusc Cuecena àn fat l puscibl, ma per l seniëur ne n’iel plu stat nia da n fé.

 

Na jëuna de 22 ani ne trajova nia plu l fla.

For a Urtijëi iel unì cherdà l Aiut Alpin per jì a ti judé a na mutade 22 ani che ne trajova nia plu l fla. Bele a Puntives òven tëut la dezijion de lascé ju cun la binda l dutor y l judacrëp cun duc i njins, pernanche n fossa ruvei leprò. Udù dant òven de l fé sun Plaza de Dlieja, ma iló fóvel iust l marcià di paures. Nsci àn tl ultimo mumënt tëut la dezijion de i lascé ju for cun la binda, ma sun Plaza Stetteneck. Ruvà pra la muta à l dutor per fertuna pudù cunstaté che la ne fova nia te cundi¬zions critiches. La ie unida meneda da na ambulanza dla Crëusc Blancia ta Bugon, ulache n ova ntant dat sëura cun l joler. Da iló iela unida meneda te spedel a Persenon.

N ntervënt sa mont iel per i Judacrëp de Gherdëina stat da fé sun Mastlé, ulache n’ëila olandeja ie tumeda sun l troi sot ala Odles ora de viers dla utia dl Troier. Ëila se ova rot na ciavidla.

 

Petà sotsëura da n bo.

Te Ulten ie n ël de 99 ani unì agredì da n bo, che ti à trat doora. Lse à fat scialdi mel, cun dut l corp plën de paches y sanghedes. L ie unì menà te spedel a Maran cun l joler.

 

 

 

valutaziun
Submitting your vote...
stampè