Home
Noeles

Nutizies dal Aiut Alpin Dolomites

L’ena passeda à l Aiut Alpin abù i ultimi ntervënc de chësta sajon da d’instà tan particulera. Publicon tlo dessot perchël danter l auter nce i numeri y la statistiches de chisc mënsc.

Chiche se à fat mel

Danter i ntervënc dl’ultima ena per chiche se à fat mel iesen julei pra l lift dl Floralpina sun la Mont de Sëuc per n jëunn de 24 ani che ie tumà ju da n pitl puent ntan na manutenzion. Bonamënter se àl nscila rot n valguna rëpes. La duturëssa ti à fat na spriza contra l mel, y pona iel unì menà te spedel a Persenon cun l joler.

Te Gherdëina se à n jëunn dl luech taià dassënn te n dëit. Tla zentrela dl Aiut Alpin a Puntives àl giapà la prima cures. Da dedò iel unì menà cun l joler te spedel a Persenon, ulache n ti à cujì la ferida.

Tla Val d’Ega iesen julei pra la firma da sigat Pichler, ulache l ie stat da ti judé a trëi lauranc capitei te n meldefuech. Unic adalerch ie nce i Destudafuech, i Carabinieri y na ambulanza che se à cruzià de doi lauranc. L terzo se l’ova paieda mpue’ deplù, y do la prima cures iel unì ciarià tl joler y menà te spedel a Bulsan.

Ntervënc saniteres

A Predoi iesen julei per n ël dl luech de73aniachëlcheltiàdatlbot tl cë. Canche n ie ruvei leprò, ova i uemes dla Crëusc Blancia bele scumencià cun la prima cures. La duturëssa à pona tëut la dezijion deberieda cun l cardiologh de lascé mené l pazient cun l joler tla sezion de emodinamica dl spedel de Bulsan.

A San Piere iel, tl restaurant Überbacher, stat da jì a ti judé a n ël de tëmp dl luech che se n stajova mel. L ël ova petà su y l ova na burta ciera. Do la prima cures dl dutor iel pona unì menà te spedel a Persenon cun l joler, per d’autra cures plu a puntin. L ie nce stat doi caji de suspet de Covid-19: un a Ciastel pra na persona de tëmp che stentova a tré l fla y un a Mölten pra n ël dl luech de 87 ani cun plu sintoms. Pra de tei caji, ulache n miena che l pudëssa vester Covid¬-19 aldò di sintoms, iel da tò ca na ambulanza che ie da dedò da dejenfeté deberieda nce cun duc i njins y la massaria. N ne jola nia cun l joler. L dutor dl Aiut Alpin vijitea danora i amalei suspec cun na tuta aposta. De reazion alergica se àl tratà pranjëunnaFiecheàmaiàna tëurta ne savan nia che l fova mandules laite, a chëles che l ie alergich. Pernanche n ie ruvei leprò se àn bel riesc ntendù che l fova sot a shock, y nsci ie l jëunn, do la prima cures dla duturëssa, unì ciarià tl joler y menà te spedel a Persenon per d’autra cures y vel’ cuntrol mplu.

Proa da sëira

Danter l auter iel nce unì fat na proa de scur pra chëla che n à fa tn jol se nuzan de n valguna bindes. Chësta proes ie scrites dant per mantenì n livel aut y n bon alenamënt che n adrova per chësta sort de ntervënc.

Numeri y statistiches dla sajon

L Aiut Alpin à scumencià ai 6 de juni y à fat ntervënc nchin ai prim de nuvëmber. Chësc ne se à nia mudà dai autri ani. L ie unì finà via avisa coche n ova fat ora, nia sciche pra la sajon da d’inviern da chëst ann che ie fineda via n mëns dan che n ova prugramà pervia dl lockdown.

Te chësta sajon da d’instà iel unì fat 451 ntervënc de sucors cun l joler. Pra la majera pert se àl tratà de jì a recuperé escursciunisć/tes y alpinisć/tes sa mont. Pra l rest iel stat dantaldut emergënzes saniteres, ma l ie nce stat da jì a crì zachei y desgrazies sun l lëur, sun streda, pra d’autra ativiteies de tëmp liede.

Te 451 ntervënc fac, iel unì julà pra 466 persones: pra 237 se àl tratà de emergënzes saniteres y pra 164 de jënt che se à fat mel. 19 persones ie mortes: de chëstes n iel 11 per emergënzes saniteres y l’autres per trauma d’autra sort. 31 ntervënc ie unii fai de nuet.

Te Südtirol àn fat 410 ntervënc, tl Trentin 15 y tla provinzia de Belun 26. La persones pra chëles

che n ie julei, univa dantaldut dala Talia (389: de chëstes 240 de Südtirol, 9 dl Trentin y 4 dla provinzia de Belun), ma nce dai Paejes Tudësc y dal’Austria (62) y da d’autri paejes oradeca (15).

L servisc de sucors scumencerà per la scuadra dl Aiut Alpin bonamënter ai 5 de dezëmber per la sajon da d’inviern.

L Aiut Alpin tol l’ucajion nce tres La Usc de rengrazië duc i y la ulenteres di judacrëp, duc chëi y chëles che juda pea y fej a na maniera che chësc servisc de gran mpurtanza posse for unì pità.

valutaziun
Submitting your vote...
stampè