Home
Noeles

35 agn de copa dl monn tl´Alta Badia

Ai 20 y ai 21 de dezëmber vëgnel tigní n slalom lerch y n slalom spezial sön la pista Gran Risa a La Ila

La 35ejima ediziun dles gares de Copa dl Monn de schi tl’Alta Badia sará n pü’atramënter de ci che an se ess imaginé, mo porchël ne manciarál dessigü nia la gran pasciun por le sport dai schi. La domënia ai 20 de dezëmber vëgnel metü a jí le tradizional slalom lerch dales 10:00 y la secunda manche é preodüda por les 13:30. Le lünesc ai 21 de dezëmber, él en chësc ann en program n slalom spezial impede le slalom paralel da sëra. I atlec de chësta disciplina se mosorará jö por les portes strëntes sön la Gran Risa dales 10:00 por le prüm iade y dales 13:00 por la secunda proa. Trames les gares gnará mostrades a livel internazional tla televijiun y insciö podará i spetadus dla Copa dl Monn fá le tifo por sü atlec diretamënter da ciasa.    

N IAT DALA NЁI A IDROGEN – NA RIVOLUZIUN TL RESPET DL’AMBIЁNT

En ocajiun dles gares de Copa dl Monn tl’Alta Badia vëgnel presenté Leitwolf h2Motion, le prüm iat dala nëi cun motor eletrich che vá a idrogen. La dita de Südtirol Prinoth á svilupé n veicul totalmënter ecologich cun n motor da 544cv sënza emisciuns, che garantësc na miú prestaziun de n’iat tradizional. Al se trata de na rivoluziun ecologica por ci che reverda la gestiun y la manutenziun dles pistes dai schi. Le iat Leitwolf h2Motion sará da odëi dai 20 ai 21 de dezëmber jödapé dla pista Gran Risa.

DÖT LE BUN GRAN RISA – 35 AGN DE GARES TL’ALTA BADIA

Ai 15 de dezëmber dl 1985 él gnü metü a jí por le pröm iade n slalom lerch de Copa dl Monn sön la pista Gran Risa a La Ila. La manifestaziun é nasciüda da n som de Marcello Varallo, ex- atlet de Copa dl Monn, che á porté adarlerch les gares sön la Gran Risa. Giulan al gran impëgn de düc i volontars á da atira les gares tl’Alta Badia albü n gran suzes, insciö da deventé n apuntamënt fis de Copa dl Monn. Te chisc 35 agn á les gares pité emoziuns sportives singolares, fajan conësce la destinaziun a livel internazional. Sön la Gran Risa, na pista nia saurida mo dër spetacolara, se al mosoré i mius altec dl schi, sciöche Ingemar Stenmark, che á davagné la prüma ediziun, Roberto Erlacher - le su atlet badiot che é rové cina sëgn sön le podest tl’Alta Badia, Alberto Tomba che á davagné cater iadi a La Ila, i dui atlec taliagn Davide Simoncelli y Max Blardone y le campiun de devëntes tl’Alta Badia Marcel Hirscher.

GIULAN A DÖC CANC!

Les gares sön la Gran Risa á dala pröma ediziun incá albü n gran suzes giulan al’impëgn di colaboradus, di partner mo dandadöt di tröc volontars, che á daidé al garaté dla manifestaziun ann por ann. L’uniun fej la forza y avisa te momënc nia sauris sciöche en chësc ann, an podü odëi la gran colaboraziun y le sostëgn da pert de düc canc, insciö da ester bogn da mët impé ince en chësc invern les gares de Copa dl Monn tl’Alta Badia. Bel giulan!

www.skiworldcup.it

valutaziun
Submitting your vote...
stampè