Home
Noeles

Nutizies dal Aiut Alpin Dolomites

Tl'ultima ena dl ann passà iel per l Aiut Alpin Dolomites stat da fé ntervënc dantaldut saniteres, ma nce per jënt che se à fat mel y nce per na levina unida ju.

Danter i ntervënc iesen julei a Longiarü per n'anda dl luech de 61 ani che ova bonamënter sasc ti renions y perchël òvela n gran mel. N ëssa ulù la mené cun l joler te spedel a Persenon, ma davia che l fova tan da nibl, àn messù dé sëura dlongia Falzes, ulache l ie unit n'ambulanza che à menà l'ëila te spedel.

A Urtijëi ie la duturëssa dl Aiut Alpin unida cherdeda per n'anda de 72 ani che se n stajova mel. N à tëut la dezijion de la mené a Puntives cun l'ambulanza y da iló demez pona cun l joler te spedel a Bulsan.

Te Val de Gsies àn messù jì a tò na persona che se à fat mel furnan ju cun i schi dal Fellhorn. De doi, iesi piei via da piza ju ndrët de viers dla valeda, ju per de tei malans. L uem ie tumà ju te ruf, se fajan mel a n uf. L majer problem ie stat che i doi ne savova nia da spieghé ulache i fova. Leprò messova la fëna, per abiné nzaul ulache l fova rë per l telefonn, se spusté dalonc dal melcapità. L prim canal ulache i minova de vester fova l fauz, y permò plu tert iesen stai boni de i localisé plu avisa. Ntant fòvel nce unit scur, nsci che n à messù tré su te joler tramedoi persones cun la binda y la lumes aposta. Per chësta gaujes ie dut ntëur l ntervënt cun i judacrëp dl'Auta Val de Puster stat scialdi ncomper. L melcapità ova do che n l à trat su tl joler n gran frëit, tant che l ne se n savova plu belau nia. Sce n ëssa mo aspità nchin al di do, ëssel povester monce pudù avëi cunesguënzes per la sanità. L ël ie unì menà te spedel a Bulsan cun l joler.

Danter i ntervënc per jënt che se à fat mel, iesen julei tla grupa de Fanes pra na muta dl luech che ie tumeda cun i schi. Bonamënter se àla rot la tibia ciancia. La jëuna ie unida metuda te na barela, recupereda cun na binda de chindesc metri y meneda te spedel a Burnech.

Sun Mont de Pana iesen jic a tò n'ëila de 54 ani che ie tumeda a pudejé, se fajan mel al uf. Do che i judacrëp de Gherdëina ti ie furnei permez cun l auto, ài riesc tëut la dezijion de cherdé l joler. L dutor ti à nscila fat na spriza contra l mel al'ëila. Da dedò iela unida ciarieda te joler y meneda te spedel a Persenon.

N ntervënt iel mo stat da fé tla Val Badia pra na levina che ie unida ndividueda cun na losa di schi de zachei che furnova ite, ma cun deguna che ne univa ora. Julan sëura la levina, che fova sot al Settsass, àn pudù udëi che l fova nce la losa di schi che univa ora, nsci fòven segures che l ne fova deguni sot ala nëif.

 

 

valutaziun
Submitting your vote...
stampè