Home
Noeles

Nutizies dal Aiut Alpin Dolomites

Danter i ntervënc che l Aiut Alpin Dolomites à fat l'ena passeda, iesen julei per n'ëila de 50 ani jita cun la peves cun si uem, tumeda furnan cun i schi da Jëuf de Sela ju de viers de Plan de Gralba. L'ëila se à rot na giama. L dutor ti à dat zeche contra l mel y da dedò iela unida meneda te spedel a Persenon cun l joler.

A Rein tla Val de Turesc ie n'ëila dl luech de 63 ani sbrisceda ora dan porta sun dlacia, se rumpian na giama. Davia che la streda fova dsareda per gauja de na levina, iesen jic a la tò cun l joler, la menan te spedel a Persenon.

N ël de Sëlva de 32 ani ie unì menà da n'ambulanza dla Crëusc Blancia pra la zentrela dl AAD a Puntives. L ël ova n gran mel al spinel. Do che l dutor l à vijità, iel unì menà cun l joler te spedel a Persenon per la cures.

Danter i ntervënc saniteres, per jënt che se n stajova mel, iel stat da julé a Ciastel per n'ëila dl luech de 80 ani, a Laag tl Unterland per n ël de 60 ani per chël che l ne n'ie purtruep stat nia plu da fé, a Neva Tudescia per n'ëila de 80 ani a chëla che l ti ova striscià l bot, a Rasun per n ël de 80 ani diabetich che sanguinova dassënn dal nes y a Karneid per n jëunn de 19 ani che ova bonamënter l Covid-19.

 

 

valutaziun
Submitting your vote...
stampè