Home
Noeles

Dlijia San Ciascian

La bela dlijia da San Ciascian é indô sciöche nöia do i laurs de restrotoraziun  

Tratan l'isté y l'altonn 2020 él gnü fat deplü laurs pro la dlijia da San Ciascian. Impröma él gnü metü sö i punc y saré ite le toch olache al gnô lauré. Spo án messü crazé y puzené jö i mürs y spo dedô i smalté danü cun cialc blancia, saurun y giarin sciöche ai ê denant, aladô de chël che vëgn preodü dala sconanza di bëgns culturai. Olache al jô debojëgn él gnü comedé fora, te deplü posć, sides sön le ciampaní co sön la falzada dla dlijia. L'ora dl ciampaní é gnüda restaurada, i toc da defet é gnüs cunciá fora y i zagri vedli án ressané. Pro l'armadöra dla ciampana (Glockenstuhl, ndr) él ince gnü dortoré. Sëgn éra indô dër bela la dlijia da San Ciascian y düc á na gran ligrëza. Por podëi curí les spëises de restrotoraziun de za. 50.000 euro, á la dlijia damané do contribuc che é spo gnüs conzedüs dal Comun de Badia, dala Cassa Raiffeisen Val Badia, dala Fraziun da San Ciascian y dales vijinanzes de Armuntarora, Ciampidel y Costadedoi. A düc de cör n gran giulan da pert dl consëi de cöra y de döta la comunité dl paisc. Al bun Salvester, che á tan fistidié ti fajunse n bun memento.  (Siur Degan Iaco Wendelin Willeit)

valutaziun
Submitting your vote...
stampè