Home
Noeles

Nutizies dal Aiut Alpin Dolomites

Danter i ntervënc dl Aiut Alpin Dolomties ntan l'ena passeda, iesen julei sëura Plan de Gralba per n'ëila de 45 ani di Paejes Basc che ie tumeda cun la roda sun l asfalt se fajan mel al mus y al piet. Ala melcapiteda ti à la duturëssa dat la prima cures y da dedò iela unida meneda te spedel a Bulsan cun l joler.

Sun la Terza Piza dla Cir à doi jëuni dl'Austria abù deficulteies a tré ju la corda, che fova resteda tacheda nzaul. Cun dodesc metri de binda àn recuperà i doi alpinisć, che n à menà cun l joler sun Dantercëpies.

Tla Val de Mesdì iesen julei per n pere y si muta che fova tl lëur de jì ju dala utia Boè de viers de Corvara. Tl prim tòch ërt dla valeda ie l pere sbriscià ora sun la nëif. Per fertuna se àl tosc fermà zënza se fé massa mel. Dala sperduda ne n'ie la muta nia plu stata bona de jì inant y nsci à i Judacrëp dla Alta Badia cherdà l joler dl AAD. Ruvei sun luegia àn trat su la muta cun na pitla binda y ciarià l pere cun n hovering. Davia che tramedoi se n stajova bën, iesi unii menei nchin a Corvara.

Sa la utia Pisciadù ie tumeda n'ëila de 69 ani, se fajan nsci na sbregheda a na giama y al cë. La ne fova nia plu bona de unì ju y perchël à i Judacrëp dla Alta Badia cherdà l joler, che à menà l'ëila te spedel a Persenon.

Tl raion dl Monte Corno tl Unterland iel stat na desgrazia per n ël dl raion de 64 ani. L ël fova tl lëur de furné ju sun na streda da giara cun la mountain bike y ie tumà ora de streda, te n rone, per zirca cënt metri. Cun na binda de 45 metri à l joler dl Aiut Alpin Dolomties lascià ju n dutor y i sucoridëures, che à messù cunstaté la mort. Nsci àn nce recuperà l corp. Sun luegia iel nce ruvà la Verdia de Finanza y i Carabinieri.

Sun Plan de Corones, puech sëura la utia Graziani, iesen julei per n seniëur tudësch de 36 ani che ie tumà cun la mountain bike. Sun luegia nce i Judacrëp de Al Plan de Mareo. L ie unì recuperà cun la binda y menà te spedel cun l joler cun n trauma ala sciables y al uf.

 

A Urtijëi àn fat n ntervënt per na pitla popa de puech plu de n ann che ie tumeda tla duscia. La popa, muta de turisć talians che fova te n hotel dl luech, ie unida meneda te spedel a Bulsan deberieda cun si oma.

I Judacrëp de Al Plan de Mareo à damandà l ntervënt dl joler dl Aiut Alpin Dolomites te Fanes per n'ëila de 31 ani. L'ëila fova bele unida upereda dan n ann y ova n mplantant. Do doi ëura che la ie jita a pe, àla abù problems y l puls fova scialdi aut. La ie unida meneda te spedel a Burnech y i cumpanies ie unii cumpaniei ju dai judacrëp.

valutaziun
Submitting your vote...
stampè