Home
Noeles

Nutizies dal Aiut Alpin Dolomites

Danter i ultimi ntervënc dla sajon da d'instà dl Aiut Alpin Dolomites iesen julei Tla Val Badia, plu avisa tla valeda de Valacia, iesen julei per ti judé a na familia svizra che ne se nfidova nia plu a jì inant pervia dl scur y pervia dl troi scialdi ërt y priculëus. Do avëi ciarià n uem di Judacrëp de Corvara, che savova a puntan ualche i fova, iesen julei sun luegia. Cun l fonin à i melcapitei dat l sëni de ulache i fova, y nsci i àn recuperei cun la binda y menei cun a Corvara al segur.

N ntervënt àn nce fat sun Stevia, ulache i Judacrëp de Gherdëina à cherdà l aiut dl AAD per n jëunn de 29 ani che se ova fat mel a n jenodl y al mus susinsom dla Palota. Do che la duturëssa ti à ciulà su la ferides, ie l jëunn unì menà te spedel a Persenon cun l joler.

Dala zentrela de Puntives iesen julei nchin te spedel a Persenon cun na jëuna de 14 ani cun n gran mel de vënter. N auter ntervënt saniter àn fat tl raion de Fanes, sun l troi danter Pederü y la utia Fanes, ulache n'ëila l'ova stleta. Ruvei sun luegia, àn lascià ora la duturëssa y n judacrëp n hovering. Do che la duturëssa ti à dat la prima cures al'ëila de 53 ani, ie la melcapiteda unida meneda te spedel a Bulsan cun l joler cun l suspet de n ictus.

 

 

 

Numeri y statistiches dla sajon

L Aiut Alpin Dolomites à te chësta sajon da d'instà fat si atività dai 10 de juni nchin ai 1. de nuvëmber. Te chësc tëmp àn fat 508 ntervënc, de chisc 469 tla provinzia de Bulsan, 13 te chëla de Trënt y 26 te chëla de Belun.

Suvënz – cun 146 ntervënc – se àl tratà de ntervënc per arpizadëures o jënt che jiva a pe sa mont. L rest ie stat ntervënc per desgrazies tl tëmp liede, sun l lëur o sun streda, per caji saniteres o per jì a crì zachei. Sun 539 persones àn abù 269 caji saniteres, 189 ferii, 64 nia ferii y 17 morc – de chisc 16 per gaujes saniteres y un tres trauma de vel' sort.

La naziunalità dla jënt che se à damandà l ntervënt dl AAD ie stata taliana te 392 caji – de chëi 244 de Südtirol, 7 dl Trentin y 7 dl Belun –, tudëscia o austriaca te 106 caji y de d'autri Stac per 41 iedesc.

35 ntervënc àn fat cun i njins per julé cun l scur.

La scuadra dl AAD tol la ucajion per rengrazië nce tres La Usc uni persona che juda pea te una o l'autra maniera acioche chësc lëur mpurtant vede inant. L Aiut Alpin scumencerà cun si atività per la sajon da d'inviern, per coche l ie udù dant te chësc mumënt, ai 4 de dezëmber.

valutaziun
Submitting your vote...
stampè